“Rusiya belə idarə oluna bilməz…”.
ABŞ Prezidenti Tramp Ağ Evdə ilk iş günü jurnalistlərin suallarını cavablandırıb.
Media ondan Putin, Zelenski və İranla bağlı suallar ünvanlayıb.
AzPost müsahibəni təqdim edir:
Sual: Putinlə nə vaxt danışmağı planlaşdırırsınız?
Tramp: – Ola bilsin tezliklə.
Sual: Sizcə, bu münaqişəyə son qoymaq nə qədər vaxt aparacaq?
Tramp: Mən prezident Putinlə danışmalıyam, biz bunu aydınlaşdırmalıyıq. O, bu vəziyyətdən məmnun ola bilməz. Putin üçün işlər yaxşı getmir. O, əlindən gələni etməyə çalışır. Lakin insanların çoxu müharibənin təxminən bir həftəyə bitəcəyini düşünürdü. İndi üç il keçib, elə deyilmi? Ona görə də məmnun qala bilməz. Amma düşünürəm ki, o, bu müharibəni bitirsə çox yaxşı iş görmüş olar. Bir milyona yaxın rus və 700 minə yaxın ukraynalı əsgərin öldüyü barədə əlimizdə məlumat var. Rusiya çox böyükdür və itirəcək bir şeyləri var. Amma ölkə belə idarə olunmur.
Sual: Bəs prezident Zelenski?
Tramp: O, mənə saziş bağlamaq istədiyini söylədi. Zelenski sövdələşmə istəyir. Bilmirəm, Putin bunu istəyir, bəlkə də yox. O, sazişə gəlməlidir. Hesab edirəm ki, o, sövdələşmədən imtina etməklə Rusiyanı məhv edir. Düşünürəm ki, Rusiyanın böyük problemləri olacaq. Onların iqtisadiyyatına baxın, Rusiyadakı inflyasiyaya baxın. Ona görə də ümid edirəm ki, o, razılaşma istəyir.
Sual: Cənab prezident, siz ABŞ-ın Rusiyaya qarşı sanksiyalarını o razılaşana qədər saxlayacaqsınızmı?
Tramp: Sanksiyalar və ya tariflər. Hesab edirəm ki, tarif sözü dolları gücləndirdiyi üçün daha yaxşıdır. Hesab edirəm ki, tariflər daha səmərəlidir. İrana qarşı sanksiyalar tətbiq edəcəm. İran iflasa uğramışdı. Mən vəzifədən gedəndə İran iflas eləmişdi. Onların HƏMAS, Hizbullah və ya başqa bir şey üçün pulları yox idi. Onlar dibə çökmüşdülər.
