Rusiya
Rusiya Federasiyasının baytarlıq və fitosanitar nəzarəti üzrə federal xidməti (“Rosselxoznadzor”) Ermənistandan ölkəyə gül idxalına məhdudiyyət qoyub. Qərar mayın 22-dən etibarən qüvvəyə minib.
AzPost.info Rusiya mediasına istinadən xəbər verir ki, Rusiya bazarının itirilməsi Ermənistan üçün ağır iqtisadi zərbə olacaq. Belə ki, İrəvan gül ixracından əldə etdiyi ümumi gəlirin 90%-dən çoxundan məhrum olmaq təhlükəsi ilə üz-üzədir.
Aparılan statistik təhlillərə əsasən, ötən il Ermənistan bu kateqoriyadan olan məhsulların satışından təxminən 49 milyon dollar qazanıb. Bu məbləğin əsas payı – 46 milyon dolları məhz Rusiyaya edilən tədarüklərin payına düşüb.
Ermənistanın gül ixrac etdiyi digər ölkələr və ordan gələn gəlirlər isə kifayət qədər simvolik xarakter daşıyır:
-
Gürcüstan: 2,3 milyon dollar
-
Qazaxıstan: 514,9 min dollar
Gül böhranı ilə yanaşı, “Rosselxoznadzor” Ermənistandan idxal olunan balıq məhsullarında da ciddi saxtakarlıq şübhələri aşkar edib. Qurum sənədlərdə “göyqurşağı alabalığı” (radujnaya forel) kimi qeyd olunan balıqların morfoloji əlamətlərinə görə reallıqda tamamilə fərqli məhsul olduğunu müəyyən edib. Bu səbəbdən bəzi erməni müəssisələrindən balıq tədarükü dayandırılıb və onlarda yoxlamalara başlanılıb.
