Baş Prokurorluq Rusiya Hakimlər Şurasının sədri Viktor Momotovun əmlakına həbs qoyulması ilə bağlı iddia qaldırıb.
AzPost bildirir ki, bu barədə “Kommersant” qəzeti məlumat yayıb.
Yazıda deyilir ki, cavabdeh sahibkarlıq fəaliyyəti ilə məşğul olub və bununla da korrupsiyaya qarşı mübarizə qanunlarını pozub. Bundan başqa, iddiada sədrin “Pokrovskiye” mütəşəkkil cinayətkar qruplaşması ilə əlaqəli olduğu iddia edilir.
Baş Prokurorluq hesab edir ki, Momotov mütəşəkkil cinayətkar dəstənin təşkilatçıları Andrey Korovaiko və Oleq Çebanovla birgə hərəkət edib. Sonuncular öz bizneslərini “hakimiyyətdən korrupsioner istifadə, zorla ələ keçirmə və ədalətsiz məhkəmə qərarlarının verilməsi” yolu ilə qurublar.
2010-cu ildə Viktor Momotov göstərdiyi xidmətlərə görə mütəşəkkil cinayətkar qrup üzvlərindən Rostov vilayətində torpaq sahəsi alıb. Həmin ərazidə sonradan 10 mərtəbəli “Sedov Marton” mehmanxanası tikilib. Ümumilikdə 44 torpaq sahəsi və 51 daşınmaz əmlak Hakimlər Şurasının sədrinə və onun köməkçilərinə dövlət qeydiyyatına alınıb.
Rusiya Hakimlər Şurasının sədri otel biznesi qurub və ondan milyardlarla rubl qazanıb.
Baş Prokurorluq Rusiya Federasiyası Hakimlər Şurasının sədri Viktor Momotovdan korrupsiyaya qarşı iddia çərçivəsində 9 milyard rubl dəyərində əmlakına həbs qoyulmasını tələb edib.
İstintaqın fikrincə, Momotov vəzifədə olarkən, bu qadağan olsa da, sahibkarlıq fəaliyyəti ilə məşğul olub. Momotov Rusiyanın bir sıra regionlarında mehmanxana biznesi ilə məşğul olub. O, yeni daşınmaz əmlakları leqallaşdırmaq üçün rəsmi vəzifəsindən istifadə edib.
İddiada bildirilir ki, Momotovun ortağı Baş Prokurorluğun “Krasnodar kriminal qruplaşmasının mühüm fiquru” adlandırdığı “Marton” otellər şəbəkəsinin sahibi Andrey Marçenko olub.
Agentlik Momotovu “Pokrovskie” cinayətkar qruplaşması ilə də əlaqələndirir.
Sentyabrın 15-də Momotovun sədrlik etdiyi Hakimlər Şurası Ali Məhkəmənin sədri vəzifəsinə baş prokuror İqor Krasnovun namizədliyini dəstəkləyib.
