Rusiya Kənd Təsərrüfatı Nazirliyi Türkiyədən pomidor idxalı üçün kvotanı artırıb. Yeni qərara əsasən, idxal limiti 500 min tondan 600 min tona yüksəldilib.
Azpost.info bildirir ki, bu barədə Rusiya Kənd Təsərüfatı Nazirliyinin açıqlamasında deyilir.
Məlumata görə, yeni kvota 2026-cı ildən qüvvəyə minəcək.
Bazarın ayrı-ayrı şirkətlərin nəzarətinə keçməsinin qarşısını almaq məqsədilə yeni məhdudiyyət də tətbiq olunub. Belə ki, bir təchizatçı il ərzində maksimum 20 min ton pomidor idxal edə biləcək.
Rusiya Kənd Təsərrüfatı Nazirliyi qərarı ölkədə təzə tərəvəzə artan tələbat və idxal mənbələrinin şaxələndirilməsi zərurəti ilə əsaslandırıb. Qurum hesab edir ki, əlavə idxal həcmi mağazalarda məhsul çeşidini artıracaq və pərakəndə satış qiymətlərinin aşağı düşməsinə kömək edəcək. Bununla yanaşı, pomidor idxalı əvvəlki kimi ciddi nəzarət altında həyata keçiriləcək. Gömrük orqanları hər bir məhsul partiyasının Rusiyanın sanitar və baytarlıq tələblərinə uyğunluğunu yoxlayacaq. İdxalçılar isə məhsulun mənşəyini təsdiqləyən sənədləri təqdim etməli olacaqlar.
Maliyyə analitiki Nikita Volkov bildirib ki, idxal kvotasının artırılması bazarda məhsul qıtlığı yaranan dövrlərdə qiymət artımının qarşısını almağa kömək edə bilər. Bununla yanaşı, o qeyd edib ki, ucuz Türkiyə pomidorunun həcminin artması yerli istehsalçılar üçün qiymət rəqabətini gücləndirəcək.
S.Abdulla
