Moskva şəhərində motosiklist Kirill Kovalyovun qətlinə görə altı nəfərdən ibarət Abbasovlar ailəsinə hökm oxunub.
AzPost MK-ya istinadla xəbər verir ki, əsas təqsirləndirilən 21 yaşlı Şahin Abbasov motosiklisti bıçaqlayaraq öldürdüyünə görə 17 il müddətinə ciddi rejimli cəzaçəkmə müəssisəsinə göndərilib.
Hadisə 2024-cü ilin 17 aprelində baş verib. Məlumata görə, 24 yaşlı Kirill Kovalyov nişanlısını evinə gətirəndən sonra həyətə daxil olub və səkidə dayanmış Toyota Camry markalı avtomobilin yolu bağladığını görüb. O, avtomobilin sahibinə — Şahin Abbasova yaxınlaşıb və sakit şəkildə irad bildirib. Mübahisə zamanı Şahin kobud cavab verərək qardaşı Şöhrəti köməyə çağırıb. Bir neçə dəqiqə sonra münaqişə davaya çevrilib və bu zaman Şahin bıçaqla motosiklistin qarnına ağır zərbə endirib. Gənc qan itkisindən xəstəxanada dünyasını dəyişib.
İstintaqın müəyyən etdiyinə görə, hadisədən sonra Abbasovlar ailəsi qətl törədən qardaşların qaçmasına kömək etmək üçün plan qurub. Onlar qohumları İsəxanla birlikdə Şahini və Şöhrəti Rostov vilayətinə aparmaq istəyiblər. Yolda iki dəfə yol polisi tərəfindən saxlanılan şəxslər rüşvət verərək keçiblər.
Məhkəmə prosesində Şahin Abbasov qətli etiraf etsə də, bunu “təsadüf” və “özünümüdafiə” kimi qələmə verməyə çalışıb. Lakin tibbi ekspertiza bıçaq zərbəsinin dərinliyinə əsaslanaraq bunun planlaşdırılmamış, lakin məqsədli zərbə olduğunu sübut edib.
Moskva Şəhər Məhkəməsinin qərarına əsasən, Şöhrət Abbasov 12 il, İsəxan Abbasov isə 8 il müddətinə azadlıqdan məhrum edilib və 1,5 milyon rubl məbləğində cərimə ödəməyə məhkum olunub. Ailənin digər üzvləri — ataları Nizami və əmisi Baxtiyar bəraət alaraq azadlığa buraxılıb.
Qurbanın valideynləri 100 milyon rubl məbləğində mənəvi təzminat tələb etsələr də, məhkəmə iddianı qismən təmin edib: Şahindən 2 milyon, Şöhrətdən 1,5 milyon, Nizamidən isə 500 min rubl məbləğində təzminat tutulacaq.
Hadisə Moskva ictimaiyyətində böyük rezonans doğurub. Hər məhkəmə iclasında onlarla motosiklist iştirak edərək qətlə yetirilən gəncin ailəsinə mənəvi dəstək göstərib və ədalətli hökmün çıxarılmasını tələb edib.
