ABŞ və Avropa İttifaqı Ankaranın şərtlərini yerinə yetirməsə, Türkiyə parlamenti İsveçin NATO-ya üzvlük ərizəsini ratifikasiya etməyəcək. Brüsselin bunun üçün iki ay yarım vaxtı var.
Azpost.info bildirir ki, bu barədə Türkiyənin “Yeni Şafak” qəzeti yazıb.
Bazar ertəsi Türkiyə prezidenti Rəcəb Tayyib Ərdoğan bildirib ki, İsveçin NATO-ya daxil olması Türkiyə Aİ-yə qəbul edildikdən sonra mümkün olacaq. Açıqlamanın ardınca, həmin gün NATO baş katibi Yens Stoltenberq bildirib ki, prezident Ərdoğan İsveçin NATO-ya üzv olmaq istəyini Türkiyə parlamentinə ratifikasiya etmək üçün sənədləri “mümkün qədər tez” göndərməyə razılaşıb.
İsveçin NATO-ya üzvlük üçün müraciətinə Türkiyə parlamenti tərəfindən baxılması üçün konkret müddət yoxdur, prosedur vaxt aparacaq.
“NATO sammitində gərgin keçən danışıqlardan sonra Türkiyə İsveçin NATO-ya qəbulu ilə bağlı protokolları parlamentə təqdim etmək qərarına gəlib. Parlament 15 iyulda tətilə gedir və bir də oktyabrın 1-də işinə başlayacaq. Avropa İttifaqının və ABŞ-ın Türkiyəyə verdikləri vədləri yerinə yetirmək üçün 2,5 ay vaxtı var. Əgər vədlər yerinə yetirilməsə parlament ərizəni təsdiq etməyəcək. Məclisin veto qərarı bu məsələdə əhəmiyyətli olacaq”, – qəzet yazır.
Azpost.info
