Tailand məhkəməsi sabiq baş nazir Taksin Çinavat haqqında irəli sürülmüş “monarxiyanı təhqir” ittihamlarını ləğv edib.
AzPost bildirir ki, qərar ölkə siyasətində ciddi rezonans doğurub və cəmiyyətin dərin parçalanmasını bir daha üzə çıxarıb.
Məlumata görə, ittihamlar 2024-cü ildə Taksinin on il əvvəl Cənubi Koreyanın Chosun Ilbo qəzetinə verdiyi müsahibəyə əsaslanırdı. O, həmin açıqlamasında 2014-cü ildə bacısı Yinqlak Çinavatın devrilməsi ilə nəticələnən çevrilişdə “saray dairələrinin” rolunu qeyd etmişdi. Məhkəmə həmin müsahibənin redaktə olunduğunu və siyasətçinin konkret monarxı hədəf almadığını əsas gətirərək işə xitam verib.
Bu qərar nadir presedent sayılır, çünki Tailandda monarxiyanı təhqir ittihamı ilə açılan işlərin 87 faizi ittihamla nəticələnir. Bununla belə, Çinavat ailəsinin hüquqi problemləri davam edir. Onun qızı, sabiq baş nazir Peetontarn Çinavat bu yaxınlarda vəzifədən uzaqlaşdırılıb və avqustun 29-da məhkəmə qarşısına çıxacaq.
Taksin Çinavat isə ölkəyə qayıtdıqdan sonra korrupsiya ittihamı ilə səkkiz il həbsə məhkum olunub, lakin kralın əfv fərmanı sayəsində həbsxanaya düşməyib. Hazırda o, polisin nəzarətində xəstəxanada qalmaqla bağlı imtiyazlı şəraitinə görə də ayrıca araşdırılır.
