Səhərlər enerji toplamaq və günə sağlam başlamaq üçün yalnız çay və ya qəhvə ilə kifayətlənmək lazım deyil. Bir çox mütəxəssis məsləhət görür ki, qəhvəyə darçın və zəncəfil əlavə etmək həm dadı zənginləşdirir, həm də orqanizm üçün faydalıdır. AzPost RBC-Ukrayna-ya istinadla xəbər verir ki, bu içki metabolizmi sürətləndirir, həzm sistemini dəstəkləyir və təbii yolla enerjini artırır.
Darçın qan şəkərinin səviyyəsini tənzimləməyə kömək edir və metabolizmin aktiv işləməsini təmin edir. Bu səbəbdən onu çəki və iştaha nəzarət edən insanlar üçün tövsiyə edirlər. Zəncəfil isə bədəni isidir, həzm sistemini stimullaşdırır və yemək sonrası ağırlıq hissini azaldır.
Araşdırmalar göstərir ki, darçın və zəncəfil serotonin və endorfin hormonlarının istehsalını dəstəkləyir, bu da yaxşı əhval-ruhiyyə və sakit bir səhər üçün faydalıdır. İçki hazırlamaq çox sadədir: güclü qəhvəyə yarım çay qaşığı darçın və yarım çay qaşığı toz zəncəfil əlavə edib yaxşı qarışdırmaq kifayətdir. İstəyə görə az miqdarda süd və ya bal da əlavə etmək olar.
Mütəxəssislər bildirirlər ki, kardamon, sarıkök və ya kajen bibəri kimi digər ədviyyatlar da qəhvə ilə yaxşı uyğunlaşır. Kajen bibəri bədənin kaloriləri yanma prosesini aktivləşdirir, sarıkök isə iltihabəleyhinə xüsusiyyətlərə malikdir və həzmi yaxşılaşdırır.
Belə bir səhər içkisi həm gündəlik menyunu zənginləşdirir, həm də uzunmüddətli olaraq enerji və yaxşı əhval-ruhiyyənin qorunmasına kömək edə bilər.
