SSRİ-nin mövcudluğunun sonuncu ilində yaradılmış Azərbaycan Müdafiə Nazirliyinin rəsmi sənədləri müstəqil dövlətin ilk kargüzarlıq sənədləri sayılır.
Azpost.info bildirir ki, Birinci Qarabağ müharibəsinin veteranı, jurnalist Rey Kərimoğlu Azərbaycan ordusunun ilk əsgərlərinə verilən hərbi bileti əvəz edən sənədi paylaşıb.
Bu sənəd SSRİ-nin vahid hərbi biletindən imtina olunması idi. Sənəddə Azərbaycan SSR-nin gerbi və Azərbaycan, rus dillərində “Azərbaycan Respublikasının Müdafiə Nazirliyi” yazılıb. Vəsiqə o zamankı müdafiə naziri, sovet hərbi xadimi Valeh Bərşadlının əmri ilə Milli Ordunun əsgərlərinə verilib.
Rey Kərimoğlunun sözlərinə görə, vəsiqə onlara 1991-ci ilin sentyabrında Ağdamda sıra düzülüşü zamanı özünümüdafiə batalyonun komandiri, Milli Qəhrəman Şirin Mirzəyev tərəfindən təqdim edilib.
Azpost.info
