Azərbaycan Dövlət Su Ehtiyatları Agentliyi və Səudiyyə Ərəbistanının “ACWA Power” şirkəti arasında “Xəzər dənizində suyun duzsuzlaşdırılması zavodunun layihələndirilməsi, tikintisi, istismarı və texniki xidməti üzrə saziş” imzalanıb.
Sazişin imzalanma mərasimi Bakıda keçirilən I Azərbaycan Beynəlxalq İnvestisiya Forumu (AIIF-2025) çərçivəsində həyata keçirilib. Sənədə Azərbaycan Dövlət Su Ehtiyatları Agentliyinin sədri Zaur Mikayılov və “ACWA Power”in baş icraçı direktoru Marko Arselli imza atıblar.
Razılaşma dizayn, tikinti, maliyyələşdirmə, istismar və texniki xidmət mərhələlərini əhatə edir. Layihənin icrası regionda su ehtiyatlarının səmərəli idarə olunmasına və içməli su təminatının yaxşılaşdırılmasına töhfə verəcək.
Forum çərçivəsində həmçinin “Emal olunmuş suyun alınmasına dair saziş” imzalanıb. Sənədi Zaur Mikayılov, İri Şəhərlərin Birləşmiş Su Təchizatı Xidmətinin İdarə Heyətinin sədri Tahir Xəlilov və Marko Arselli imzalayıblar.
İnvestisiya Forumu çərçivəsində əlavə olaraq Anlaşma Memorandumu da imzalanıb. Memorandumu Azərbaycan Dövlət Su Ehtiyatları Agentliyinin tabeliyində “Su və Meliorasiya Elmi Tədqiqat İnstitutu” publik hüquqi şəxsinin İdarə Heyətinin sədri Mir Mövsüm Dadaşov və “ACWA Power” şirkətinin Azərbaycan və Türkiyə üzrə Baş Meneceri Selim Güven imzalayıblar.
Bundan əlavə, iqtisadiyyat naziri Mikayıl Cabbarov, İqtisadi Zonaların İnkişafı Agentliyinin İdarə Heyətinin sədri Seymur Adıgözəlov və Marko Arselli “Torpaq icarəsi haqqında saziş”ə, maliyyə naziri Sahil Babayev və Marko Arselli isə “Dövlət zəmanəti haqqında saziş”ə imza atıblar.
