Rusiyalı mütəxəssislər suşi və rolların sağlamlıq baxımından təhlükəli olduğunu açıqlayıb.
AzPost xəbər verir ki, Rusiya Biotexnologiya Universitetinin (ROSBİOTEX) baytarlıq-sanitariya ekspertizası və bioloji təhlükəsizlik kafedrasının dosenti Polina Kulaç “Qazeta.ru”ya müsahibəsində bu yeməklərin insan orqanizmi üçün risklərini sadalayıb.
Onun sözlərinə görə, çiy balıqdan hazırlanan suşi və rollar küçə şaurması qədər təhlükəli ola bilər. Balığın tərkibində çoxlu sayda parazit və bakteriyalar mövcuddur ki, onlar orqanizmə keçərək ciddi xəstəliklər yarada bilər. Bundan başqa, bəzi balıq növlərində yüksək miqdarda civə toplanır.
Ekspert əlavə edib ki, bu yeməklərdə istifadə olunan souslar həddindən artıq duz və kalori daşıyır. Bu isə həm allergik reaksiyalara, həm də qalxanabənzər vəzidə problemlərə səbəb ola bilər.
Ən geniş yayılmış təhlükə isə parazitlərlə yoluxmadır. Polina Kulaçın sözlərinə görə, xüsusilə anizakidoz adlanan xəstəlik – nematod qurdlarının törətdiyi infeksiya – çiy balıq məhsulları ilə çox asanlıqla insan bədəninə keçə bilir.
Bundan əlavə, çiy balıqda tez çoxalan stafilokokk, salmonella və listeriya bakteriyaları da insan sağlamlığı üçün ciddi təhlükə yaradır. “Xüsusilə tuna və qızılbalıqla hazırlanan rollar daha çox risklidir”, – deyə mütəxəssis xəbərdarlıq edib.
