ABŞ-da qeyri-ənənəvi biznes modeli ilə diqqət çəkən bir təşəbbüs media və sahibkarlıq dairələrində maraq doğurur. “FreeWater” (“PulsuzSu”) adlı bu təşəbbüs, suyu tamamilə pulsuz paylayaraq gəlir əldə etməyi hədəfləyir.
AzPost xəbər verir ki, şirkətin yaradıcısı Coşua Kliffords (Joshua Cliffords) adlı amerikalı sahibkardır.
O, su şüşələrinin üzərindəki boş sahəni reklam platformasına çevirərək innovativ bir iş modeli qurub. Su şüşələri tamamilə pulsuz paylanır və bu xərclər reklam verən şirkətlər tərəfindən qarşılanır. Şüşələrin üz qabığında QR kodlar yerləşdirilir və istifadəçilər bu kodlar vasitəsilə kampaniyalara, endirimlərə və müxtəlif markaların təklif etdiyi məzmuna keçid edə bilirlər.
“FreeWater” reklamverənlər üçün yeni və cəlbedici bir platforma təqdim edir. Hər bir su şüşəsi əslində bir reklam daşıyıcısına çevrilir və beləliklə, minlərlə insana həm faydalı məhsul təqdim olunur, həm də markalar geniş görünürlük əldə edir. Şirkət bu model vasitəsilə suyun maya dəyərini reklam gəlirləri ilə qarşılamaqla yanaşı, qazanc da əldə edir. Məlumata görə, hər bir butulkadan təxminən 1 dollar gəlir götürülür, bunun 10 senti su problemi yaşayan bölgələrə yardım üçün ayrılır. Bu yanaşma şirkətin həm kommersiya, həm də sosial məsuliyyət daşıyan bir təşəbbüs kimi tanınmasına səbəb olub.
Şirkət 2020-ci ildən etibarən fəaliyyətə başlayıb və ilkin mərhələdə Coşua Kliffords və həyat yoldaşı bu təşəbbüsə 100 min dollardan çox şəxsi vəsait yatırıb. 2023-cü ilə qədər isə əlavə olaraq 250 min dollar məbləğində maliyyə dəstəyi toplayıb ki, bu vəsaitin əhəmiyyətli hissəsi sosial media üzərindən toplanıb. Şirkət 2022-ci ildə təxminən 7 milyon dollar dəyərində qiymətləndirilib.
Bununla belə, bu model müəyyən tənqidlərə də məruz qalır. Bəzi mütəxəssislər bildirirlər ki, əgər bir məhsul pulsuz təqdim olunursa, istifadəçi özü məhsula çevrilir. Yəni reklamverənlər istifadəçilərin məlumatlarını toplayaraq onları davranışlarına əsasən hədəfləyə bilərlər. Bu isə məxfilik və etik məsələlər baxımından narahatlıq doğurur.
Mənbə: Valyuta.az
