Tailand parlamentinin üzvü Amarat Çokepamitkul sosial şəbəkələrdə üç ay əvvəl seçicilərə verdiyi səs-küylü vədi reallaşdırıb.
AzPost xəbər verir ki, məsələ ondan ibarətdir ki, deputat iyun ayında bəyan etmişdi: əgər Baş nazir Payetongtarn Şinavatra 2025-ci ilin sonunadək postundan uzaqlaşdırılsa, o, çılpaq halda rəqs edəcək. Avqustun 29-da Konstitusiya Məhkəməsi Şinavatranı etik normaları pozduğuna görə vəzifədən kənarlaşdırdıqdan sonra qadın siyasətçi sözünü tutub.
Çokepamitkul bu məqsədlə Nakhonpatxom vilayətində yerləşən müqəddəs ziyarətgahın ərazisinə gedib. Burada xüsusi qurulan çadırda o, müqəddəs heykəlin qarşısında simvolik rəqs ifa edib. Yerli mətbuat həmin rəqsi “ənənəvi mərasim” adlandırsa da, sosial şəbəkələrdə yayılan kadrlar böyük rezonans doğurub.
Bildirilib ki, deputat hər şeyi nümayiş etdirməyib, bədənini pərdə arxasında gizlədib. Buna baxmayaraq, izləyicilərdən çoxu onun cəsarətini alqışlayıb.
Amarat isə açıqlamasında bildirib ki, əslində nə müqəddəs inanclara bağlıdır, nə də batil düşüncələrə inanır: “Mən bu vədi sadəcə Baş nazirdən əsəbiləşdiyim üçün vermişdim”, – deyə o vurğulayıb.
Hadisə Tailand siyasətində həm ictimai rəyin, həm də sosial şəbəkələrin təsir gücünü bir daha nümayiş etdirib.
