Amerikalı senatorlar Riçard Blumental və Lindsi Qrem yenidən prezident Co Bayden administrasiyasını Rusiyanı “terrorizmə sponsoruluq edən ölkələr” siyahısına salmağa çağırıblar.
Azpost.info xəbər verir ki, hər iki senator iyul ayında Ukraynaya səfər edib və orada prezident Vladimir Zelenski ilə görüşüb.
“Administrasiya Rusiyaya deməlidir ki, biz onları İran və Kuba ilə bir sırada görürük”, – R.Blumental deyib.
L.Qrem bildirib ki, konqresmenlər Rusiyaya qarşı daha çox sanksiyalar tətbiq etmək üçün çalışırlar: “Biz onları “terrorizmin sponsoru” siyahısına salmaq niyyətindəyik. Bu, dünyaya ABŞ-ın Ukrayna məsələsində qətiyyətli mövqeyini göstərəcək”.
Qeyd edək ki, iyulun sonlarında ABŞ Senatı Dövlət Departamentini Çeçenistan, Gürcüstan, Suriya və Ukraynada baş verən hadisələrə görə Rusiyanı terrorizmə sponsorluq edən dövlət kimi tanımağa çağıran qətnamə qəbul etmişdi.
Səsvermə yolu ilə qəbul edilən sənəddə bildirilir ki, ABŞ Senatı Rusiya hökumətinin prezident Vladimir Putinin göstərişi ilə törətdiyi hərəkətləri terror aktlarına sponsorluq kimi qiymətləndirir.
Rusiya Xarici İşlər Nazirliyinin rəsmi nümayəndəsi Mariya Zaxarova isə bəyan etdi ki, ABŞ Rusiyanı “terrorizmin sponsoru” elan etsə, iki ölkə arasında diplomatik münasibətlər kəsiləcək.
Azpost.info
