“Ermənistanda qaz ucuz deyil. Sərhəddən istehlakçıya qədər olan yolda qazın qiymətinə əlavə olunan məbləğ digər ölkələrlə müqayisədə ən yüksək göstəricidir”.
Azpost.info-nun məlumatına görə, bunu Ermənistanın Baş naziri Nikol Paşinyan sentyabrın 11-də keçirdiyi brifinqdə bildirib.
“Qaz həyətə qədər ucuz gəlirsə, amma istehlakçı onu baha qiymətə alırsa, bunun istehlakçıya nə faydası var?” – Paşinyan deyib.
O əlavə edib ki, “Qazprom Ermənistan” böyük mənfəət əldə edir və bu, təsdiq edilməli olan faktdır.
Paşinyanın sözlərinə görə, Ermənistan hakimiyyəti qaz təchizatının şaxələndirilməsi istiqamətində addımlar atacaq:
“Şaxələndirməyə getməyəcəyimiz heç bir sahə yoxdur. Siyasi qərar ondan ibarətdir ki, biz müstəqilliyimizi və dövlətçiliyimizi inkişaf etdirəcəyik. Qalan məsələlər cari problemlər və konkret vəziyyətlərdir, onların konkret həlləri ola bilər. Əgər qiymətlərin bahalaşması ilə bağlı vəziyyət yaranarsa, biz də düşünəcəyik ki, qiymətini nəyi artıraq və ya nəyi pulsuz edək. Vəziyyəti sakit şəkildə izləyirik və heç nədən asılı olmayaraq şaxələndirməni davam etdirəcəyik”.
Paşinyan bildirib ki, Ermənistanın qazı ikinci və ya üçüncü mənbədən əldə etmək imkanı yaranarsa, hakimiyyət bundan istifadə edəcək.
Onun sözlərinə görə, TRIPP layihəsi çərçivəsində qaz kəmərinin çəkilməsi mümkün olarsa, bu da həyata keçiriləcək və Ermənistan hətta tranzit ödənişləri əldə edə bilər.
Paşinyan vurğulayıb ki, hakimiyyətin istənilən ssenari üzrə nə etmək barədə planı var.
