Ukrayna ordusu Rusiyanın qarşısıalınmaz hesab edilən hipersəsli “Kinjal” raketini vurub.
Azpost.info xəbər verir ki, bunu Ukrayna Hərbi Hava Qüvvələrinin komandanı, general Nikolay Oleşuk deyib.
“Ukrayna xalqını bu tarixi hadisə münasibətilə təbrik edirik! Bəli, biz “analoqu olmayan” Kinjal”ı vurduq!” – o, Teleqram kanalında yazıb.
Oleşukun sözlərinə görə, raket mayın 4-də gecə hücumu zamanı Rusiya ərazisindən MiQ-31K tərəfindən buraxılıb. O, “Patriot” hava hücumundan müdafiə sistemi tərəfindən Kiyev bölgəsi üzərində səmada vurulub. PAC-3 modifikasiyasındakı bu komplekslər ballistik raketləri vurmağa qadirdir.
Ukrayna Silahlı Qüvvələri “Patriot” kompleksi tərəfindən X-47 “Kinjal” raketinin məhv edilməsini rəsmən təsdiqləyib.
Bundan başqa, 8 “Şahid” dronu məhv edilib. Kamikadze dronlar mayın 6-na keçən gecə cənub istiqamətindən – Azov dənizinin şərq sahilindən buraxılıb.
Rusiya Müdafiə Nazirliyi hələlik bu məlumatı şərh etməyib. Ötən ilin avqustunda müdafiə naziri Sergey Şoyqu “Rossiya 1” telekanalına müsahibəsində Rusiya Silahlı Qüvvələrinin Ukraynadakı döyüş əməliyyatlarında üç dəfə “Kinjal” hipersəs raketindən istifadə etdiyini və hamısında parlaq nəticə aldıqlarını deyib.
Şoyqunun sözlərinə görə, başqa heç kimdə belə bir raket yoxdur. O əmin etmişdi ki, “Kinjal” nə aşkar edilə, nə də tutula bilər.
“Patriot” hava hücumundan müdafiə sisteminin son modifikasiyası “Xəncər” və “Zirkon” hipersəs raketlərini vura bilər, – Ukraynanın ehtiyatda olan generalı İqor Romanenko BBC-yə bildirib.
Ağ Evin strateji kommunikasiyalar üzrə koordinatoru Con Kirbi bildirib ki, “Patriot” sistemi ilk növbədə ballistik raketləri ələ keçirmək üçün nəzərdə tutulub.
İlk “Patriot”lar Ukrayna ordusuna mart ayında təhvil verilib.
Azpost.info
