“Ukraynanın əks-hücum əməliyyatı Rusiya üçün sürpriz olmadı. Çünki Kiyev Qərbdən aldığı pul və silahlara görə, özünü subut etməlidir”.
Azpost.info bildirir ki, bu barədə Rusiya Təhlükəsizlik Şurasının sədr müavini Dmitri Medvedev deyib.
“Düşmən çoxdan böyük əks-hücum vəd edib. Belə görünür, artıq başlayıblar. Təəccüblü deyil, çünki Kiyev rejiminin seçimi yoxdur. Aldıqları pullara və silahlara haqq qazandırmaq lazımdır”, – deyə siyasətçi Telegram kanalında yazıb.
Medvedevin sözlərinə görə, Amerika agentlərinin bir neçə xəbəri prezident Vladimir Zelenskini və digər Ukrayna rəsmilərini hesabdan silmək üçün kifayətdir. “Buna görə də Kiyevin sona qədər getməkdən başqa çarəsi yoxdur”, – o əlavə edib.
Medvedev bununla yanaşı, düşmənin gücünü gözardı etməməyə çağırıb. Onun sözlərinə görə, Kiyev və Qərb Rusiyanı yer üzündən silmək üçün hər şeyə hazırdır. Siyasətçi qeyd edib ki, indi Rusiya mümkün qədər diqqəti cəmləməli və layiqli cavab verməlidir.
O, Rusiya ordusunun aviasiya, zirehli qüvvələr və dəqiq silahlarda əhəmiyyətli üstünlüyünə işarə edib.
Medvedev deyib ki, Rusiya hərbçiləri düşməni dayandırmalı, sonra Kiyevdə nasist rejimini devirmək üçün hücuma keçməlidir.
Qışdan bəri Ukraynanın əks-hücuma hazırlaşdığı bildirilir. Bəzi rəsmilər hücumun artıq başladığını desələr də, rəsmi Kiyev bunu hələ elan etməyib.
Azpost.info
