Umico
Umico (Birmarket) platformasının müştərisi Elvin Əliyev sifarişi ilə bağlı ciddi narazılıq yaşadığını bildirib.
AzPost xəbər verir ki, onun sözlərinə görə, 12 iyul tarixində verdiyi sifariş sistemdə 14 iyulda çatdırılmalı kimi qeyd olunsa da, bu gün – 17 iyulda belə sifariş hələ də ünvanına çatdırılmayıb.
Müştəri qeyd edib ki, bir neçə dəfə platformanın operatorlarına yazılı müraciət ünvanlayıb. Dünən sifarişin ləğv edilməsini istədikdə, “Əli” adlı operator sifarişin artıq çatdırıldığını deyib. Lakin Elvin Əliyev bildirir ki, nə SMS, nə də tətbiq vasitəsilə bu barədə heç bir bildiriş almayıb.
Şikayətçi bu gün də dəstək xidmətinə yazaraq sifarişin vəziyyəti ilə maraqlanıb. Lakin bu dəfə də ona sifarişin çatdırıldığı bildirilib. Eyni cavabın təkrarlanmasına baxmayaraq, nə məhsul gəlib, nə də ləğv prosesi həyata keçirilib.
Müştəri həm sifarişin reallıqda çatdırılmadığını, həm də operatorların yanlış məlumat verdiyini əsas gətirərək, bu vəziyyəti alıcı hüquqlarının pozulması kimi qiymətləndirir. O, məsələnin operativ şəkildə araşdırılmasını və müştəri hüquqlarının qorunmasını tələb edir.
Qeyd edək ki, istehlakçı hüquqlarına görə, vətəndaş sifarişi ləğv etmək və məhsulun gecikməsi ilə bağlı əsaslı izahat almaq hüququna malikdir. Hazırda məsələ ilə bağlı Umico tərəfindən rəsmi açıqlama verilməyib.
