Rusiyanın Vladiqafqaz şəhərində yerləşən və ölkənin memarlıq abidəsi kimi qorunan qədim islam ibadətgahı – Murtuza Muxtarov məscidi özünəməxsus tarixi ilə seçilir.
AzPost xəbər verir ki, məscidin inşasına 1900-cü ildə başlanılıb və 1909-cu il oktyabrın 14-də ibadət üçün açılıb. Tikinti işlərinin ümumi dəyəri 80 min rubl olub. Bu məbləğin 50 min rublunu məşhur Bakı milyonçusu və xeyriyyəçi Murtuza Muxtarov ehsan edib.
1934-cü ildə SSRİ rəhbəri İosif Stalinin göstərişi ilə ölkə ərazisində ibadətgahların sökülməsi qərara alındıqda, Vladiqafqaz şəhər şurası həmin siyahıya bu məscidi də daxil edib. Sapyorlar binanı partlatmaq üçün bünövrəyə və divarlara minalar yerləşdirsələr də, şəhərdə yerləşən 84-cü kavaleriya alayının 25-ci tatar rotasının komandiri Betkenev və onun tabeliyində olan müsəlman əsgərlər məscidi silahla qoruyaraq dağıdılmasına imkan verməyiblər.
Bu hadisədən sonra şəhər rəhbərliyi məcburən məscidi sökməkdən imtina edib və ona “memarlıq abidəsi” statusu verilib.
Hazırda Vladiqafqaz sakinləri, xüsusən də yaşlı nəsil bu müqəddəs məkanı hələ də “Muxtarov məscidi” adı ilə yad edirlər.
