yaşıl çayın
Yaşıl çay uzun illərdir sağlam içki kimi tanınsa da, onun həm faydaları, həm də müəyyən riskləri hələ də geniş müzakirə olunur.
AzPost xəbər verir ki, rusiyalı qastroenteroloq həkim Yevgeni Belousov yaşıl çayın sağlamlıq üçün faydalarından və bəzi hallarda risklərindən danışıb. Onun sözlərinə görə, yaşıl çayın tərkibindəki təbii antioksidantlar, vitaminlər və mikroelementlər orqanizmin müxtəlif funksiyalarına müsbət təsir göstərir.
Ən mühüm komponentlərdən biri katexinlərdir – bu maddələr hüceyrələrin qocalma sürətini azaldır və iltihab əleyhinə təsir göstərir. Həmçinin, yaşıl çay maddələr mübadiləsini sürətləndirərək termogenezi stimullaşdırır, bu isə enerji səviyyəsinin yüksəlməsi və çəkiyə nəzarət baxımından əhəmiyyətlidir.
Bundan əlavə, içkinin ürək-damar sisteminə təsiri də müsbət qiymətləndirilir: “Pis” xolesterinin səviyyəsini aşağı salır, damar elastikliyini artırır və nəticədə hipertoniya və ateroskleroz riskini azaldır.
Yevgeni Belousov yaşıl çayın beyin funksiyalarına da faydalı təsir göstərdiyini qeyd edir. Xüsusilə, tərkibindəki kofein və L-teanin maddələrinin birgə təsiri sayəsində diqqəti artırır, narahatlığı azaldır və emosional tarazlığı qoruyur – bu isə kəskin stimullaşdırıcı effekt yaratmadan zehni fəaliyyətə dəstək verir.
Eyni zamanda yaşıl çay immun sistemini gücləndirir, orqanizmin müqavimətini artırır və bəzi xərçəng növlərinin qarşısının alınmasında da mümkün rolundan bəhs olunur.
Lakin bütün bu müsbət tərəflərlə yanaşı, həkim xəbərdarlıq edir ki, yaşıl çayı bəzi insanlar ehtiyatla içməlidirlər. Xüsusilə kofeinə həssas olan şəxslərdə yuxusuzluq və baş ağrısı törədə bilər. Boş mədəyə içildikdə isə ürəkbulanma və yanma hissi yarana bilər. Həmçinin bəzi dərman preparatları ilə qarşılıqlı təsirə girərək onların təsirini azalda bilər.
