Zamirə Hacıyevanın müsadirə olunan əmlakı satışa çıxarılıb
Azərbaycan Beynəlxalq Bankının sabiq rəhbəri, hazırda Bakıda həbsdə olan Cahangir Hacıyevin həyat yoldaşı Zamirə Hacıyevanın müsadirə olunan əmlakı Böyük Britaniyada satışa çıxarılıb.
AzPost Haqqın.az-a istinadən bildirir ki, Britaniya mənbələrinin məlumatına görə, Hacıyevaya məxsus Londonun Knightsbridge rayonundakı villa, həmçinin Berkşirdəki qolf klubu 19,5 milyon funt sterlinq (təxminən 25 milyon dollar) dəyərindədir.
Əmlak Milli Cinayət Agentliyi (NCA) tərəfindən altı illik dələduzluq və çirkli pulların yuyulması istintaqının bir hissəsi kimi müsadirə edilib.
Uzun mübahisədən sonra Z.Hacıyeva Askotdakı Mill Ride qolf klubundan və Knightsbridgedəki malikanədən imtina etməyə razı olub.
London Ali Məhkəməsi NCA-nın “İzah olunmayan Sərvət” Aktı ilə Hacıyevaya qarşı irəli sürülən iki ittihamı təsdiqləyib. Lakin agentliklə bağlanmış sövdələşmə çərçivəsində dondurulmuş zinət əşyaları ona qaytarılıb.
Böyük Britaniya hökuməti həbs edilmiş aktivlərin satışından əldə edilən gəlirin 70 faizini alacaq.
Agentlik əmlakın cinayət yolu ilə əldə edilmiş vəsait hesabına əldə edildiyini vurğulayıb.
