Terrorçu
Mozambikin şimalında son günlər ən azı 120 uşaq silahlı yaraqlılar tərəfindən qaçırılıb. Bu barədə aparıcı beynəlxalq insan haqları təşkilatları məlumat yayıb. Hadisə ölkənin Kabo Delqado əyalətində qeydə alınıb. Mütəxəssislər bölgədə oğurluq hallarının daha da artacağından ehtiyat edirlər.
AzPost bildirir ki, qaçırılan uşaqlar terrorçular tərəfindən müxtəlif məqsədlərlə istismar olunur. Onlar talan edilmiş malların daşınması, məcburi əmək və bəzi hallarda döyüşçü kimi cəlb edilir. Hətta bəzi qız uşaqları məcburi nikaha məcbur edilir.
Məlumata görə, bu dəhşətli cinayətlərin arxasında İslam Dövləti* və Əl-Şəbab* adlı terror qruplaşmaları dayanır. Qeyd edək ki, Mozambik 2017-ci ildən bəri islamçı üsyançılarla mübarizə aparır və ölkə ordusu bu mübarizədə Ruanda və Cənubi Afrika kimi tərəfdaşlardan dəstək alır.
Xatırladaq ki, yaraqlılar 2020-ci ildə də onlarla insanı, o cümlədən uşaqları vəhşicəsinə qətlə yetirmişdi. Şahidlər bildirir ki, qaçırılan uşaqlar sonrakı hücumlarda məcburi döyüşçü kimi istifadə olunub.
BMT-nin məlumatına əsasən, hazırda bölgədə 600 mindən çox insan evini tərk edib və zorakılıqlar Mozambikin digər əyalətlərinə də yayılıb. Hüquq müdafiəçiləri hökuməti uşaqları xilas etmək və yeni qaçırılmaların qarşısını almaq üçün təcili tədbirlər görməyə çağırıb.
Norveç Qaçqınlar Təşkilatının baş katibi Yan Egeland əyalətə səfərindən sonra vəziyyəti inkişaf etmiş humanitar böhran kimi qiymətləndirib. O bildirib ki, iqlim dəyişiklikləri, artan zorakılıq və aclıq əhalinin həyatını cəhənnəmə çevirib.
Hazırda bölgədə 5 milyondan çox insan ciddi aclıqla, 900 mindən çox insan isə fövqəladə vəziyyətlə üz-üzədir.
