ABŞ alimləri dünyaya nisbətən yaxın məsafədə – cəmi 18 işıq ili uzaqlıqda yerləşən yeni ekzoplanet aşkar ediblər. AzPost-un SciTechDaily-ə istinadla məlumatına görə, GJ 251 c adlandırılan bu planet “super-Yer” kateqoriyasına daxildir və orada həyat üçün əlverişli şəraitin olması istisna edilmir.
Tədqiqatçılar bildirirlər ki, planetin kütləsi Yerdən təxminən dörd dəfə böyükdür. Ən önəmlisi isə odur ki, GJ 251 c ulduzundan elə məsafədə yerləşir ki, səthində suyun maye halda qalması mümkün görünür. Bu faktor isə potensial yaşana bilən planetlərin əsas meyarlarından sayılır.
GJ 251 c qırmızı cırtdan M-tipli ulduzun ətrafında cəmi 18 günə bir dövrə vurur. Alimlər planetin mövcudluğunu ulduzun cazibə qüvvəsi təsiri ilə yüngül “yalpalanması” əsasında müəyyən ediblər — bu, yaxın orbitdə kütləvi obyektin olduğunu göstərən klassik radial sürət üsuludur.
Hazırda GJ 251 c rəsmi olaraq “planet namizədi” statusundadır və yekun təsdiq üçün daha dəqiq müşahidələr tələb olunur. Bu məqsədlə hazırda tikintisi davam edən 30 metrlik TMT (Thirty Meter Telescope) teleskopunun imkanlarından istifadə ediləcəyi gözlənilir.
Kəşf astronomiyada yeni ümidlər yaradıb: alimlər yaxın illərdə GJ 251 c planetinin atmosferini, kimyəvi tərkibini və həqiqətən yaşana bilən olub-olmadığını araşdırmağı planlaşdırırlar.
