Kanadanın “Realbotix” şirkəti insanlarla ünsiyyət üçün nəzərdə tutulan “Echo” adlı insanabənzər robotlar seriyasını təqdim edib.
Bu barədə “Interesting Engineering” nəşri yazır.
Robotların qiyməti masaüstü model üçün 11 950 dollardan başlayır, tam ölçülü versiya üçün isə 59 950 dollara çatır. Robotlar süni dəri, hərəkət edən elementlər və “ChatGPT”, “Claude” və “Gemini” də daxil olmaqla, müxtəlif süni intellekt sistemləri ilə inteqrasiya olunmuş danışıq texnologiyaları ilə təchiz edilib.
İlk istehsal seriyasına cəmi 250 robot daxil olacaq. Onlardan 225-i masaüstü, 25-i isə tam ölçülü modeldir. Tədarüklərin 2027-ci ilin ikinci yarısında başlanması planlaşdırılır. İlkin sifarişi 199 dollar depozit ödəməklə rəsmiləşdirmək mümkündür. Bununla belə, robotlardan istifadə üçün proqram təminatına aylıq abunə haqqı da tələb olunacaq.
Təxminən 81 santimetr hündürlüyündə olan “Echo Tabletop” masaüstü modelinin çəkisi 11,3 kiloqramdır. Robot 17 hərəkət sərbəstliyi dərəcəsinə malikdir. Onun üzü və boynu silikon əsaslı sintetik dəri ilə örtülüb.
İstehsalçı bu modeli fərdi ünsiyyət, o cümlədən təhsil, terapiya və şəxsi rifah sahələrində istifadə üçün nəzərdə tutub.
Tam ölçülü “Echo Full Body” modelinin qadın versiyasının hündürlüyü təxminən 183 santimetr, kişi versiyasının hündürlüyü isə 196 santimetrdir. Hər iki modelin çəkisi təxminən 40 kiloqramdır.
Bu robotlar bədənin yuxarı hissəsinin daha geniş diapazonda hərəkət etməsinə imkan verən 39 hərəkət sərbəstliyi dərəcəsinə malikdir. Bununla belə, robotlar insan bədəninin hərəkət imkanlarını tam təkrarlamır. Hərəkət sərbəstliyi dərəcələrinin sayı onların insanlar kimi sərbəst hərəkət edə bilməsi demək deyil.
Hər iki model üz ifadələrini dəyişə bilir və səsli ünsiyyət üçün dinamiklərlə təchiz olunub. İstifadəçilərə fərqli səslərə və xarakterlərə malik dörd personaj təqdim ediləcək: Aria, Mila, Deyv və Amar.
Şirkətin məlumatına görə, robotlar 100-dən çox dili dəstəkləyir və həmsöhbətinin dilində cavab verə bilir.
“Vinci” adlı əlavə sistem kompüter görməsi və məlumatların lokal emalı hesabına robotların imkanlarını genişləndirir. Bu sistem üzləri tanımağa, baxış istiqamətini izləməyə, emosional siqnalları müəyyənləşdirməyə, həmçinin məkan və zaman kontekstini nəzərə almağa imkan verir.
Şirkət 2027-ci ildə bu personajların rəqəmsal versiyalarını da istifadəyə verməyi planlaşdırır. Beləliklə, istifadəçilər fiziki robotdan uzaqda olsalar belə, kompüter, planşet və ya smartfon vasitəsilə onlarla ünsiyyət qura biləcəklər.
“Realbotix” bildirir ki, söhbət tarixçəsi, yadda saxlanılan xatirələr və üz tanıma məlumatları robotun özündə və ya ona qoşulmuş avadanlıqda saxlanılır.
Lakin bulud xidmətlərindən istifadə zamanı sorğuların emalı üçün zəruri məlumatlar üçüncü tərəf süni intellekt və səs xidmətləri təminatçılarına ötürülə bilər.
Şirkət həmçinin xəbərdarlıq edir ki, robotlardan istifadə etmək üçün “Robot Configuration App” tətbiqinə abunə olmaq lazımdır. Abunəliyin aylıq qiyməti 19,99 dollardan başlayır.
N.Talıblı
