ABŞ-Çin
ABŞ minerallarla təminat sahəsində Çindən son dərəcə asılıdır.
Musavat.com xəbər verir ki, “Bloomberg” ekspertləri bu səbəbdən Vaşinqtonun Çinlə ticarət müharibəsinə başlamamalı olduğu qənaətindədirlər.
Belə ki, ABŞ 15 kritik mineral üzrə 100 faiz, digər 29 maddə üzrə isə 50 faizdən çox Çindən asılıdır. Agentlik qeyd edir ki, ABŞ-ın yeni administrasiyasının yeni yataqlara çıxış əldə etmək və onların işlənməsi kursunun həyata keçirilməsi çoxsaylı çətinliklərlə bağlıdır və onilliklər çəkə bilər.
“Bloomberg” yazır ki, Vaşinqton Pekinlə qarşılaşmaq əvəzinə indiki mərhələdə minerallardan daha səmərəli istifadə üçün texnologiyalar inkişaf etdirməli, həmçinin mineral idxalını diversifikasiya etmək üçün ABŞ-la dost ölkələrlə daha fəal işləməlidir.
Qeyd edək ki, Donald Trampın Ağ Evə qayıtmasından sonra Çin və ABŞ arasında ticarət və iqtisadi əlaqələr daha da pisləşib. ABŞ prezidenti martın 4-dən bütün Çin mallarına əlavə rüsumları 20 faizə qədər artırıb. Çin ABŞ-dan gələn enerji resurslarına, iri mühərrikli avtomobillərə, kənd təsərrüfatı məhsullarına və digər mallara məqsədyönlü cavab rüsumları tətbiq edib.
