Azərbaycanda hibrid mühərrikli avtomobillərə maraq sürətlə artır. AzPost xəbər verir ki, Dövlət Gömrük Komitəsinin yaydığı son məlumat bu tendensiyanı təsdiqləyir.
Rəsmi statistikaya əsasən, təkcə 2025-ci ilin aprel ayında ölkəyə 9 868 ədəd minik avtomobili gətirilib. Onların 43 faizini və ya 4 216-nı isə hibrid mühərrikli avtomobillər təşkil edib. Bu göstərici 2024-cü ilin eyni dövrü ilə müqayisədə 2.8 dəfə çoxdur.
Mütəxəssislər artımın səbəbini həm qiymətlərin aşağı düşməsi, həm də vergi və gömrük güzəştlərində görürlər. Avtomobil ticarəti ilə məşğul olan Eldar Əliyev Baku TV-yə açıqlamasında bildirib ki, hibrid avtomobillər ölkəyə daha sərfəli qiymətlərlə idxal olunur. Bununla yanaşı, bazarda idxalçıların sayının çoxalması qiymətlərin süni şəkildə qalxmasının qarşısını alır.
Qiymət endişi rəsmi rəqəmlərdə də əksini tapıb. Belə ki, 2024-cü ilin aprelində idxal olunan hibrid mühərrikli bir avtomobilin orta qiyməti 29 272 ABŞ dolları olduğu halda, 2025-ci ilin eyni ayında bu məbləğ 28.7 faiz azalaraq 20 875 dollara düşüb.
Ekspertlərin sözlərinə görə, qiymətlərin ucuzlaşmasının əsas səbəblərindən biri də hökumətin bu seqmentə tətbiq etdiyi güzəştlərdir. Belə ki, 2026-cı ilin yanvar ayının 1-dək istehsal tarixi 3 ildən və mühərrikinin həcmi 2500 kubsantimetrdən çox olmayan hibrid avtomobillərin idxalı və satışı əlavə dəyər vergisindən azad edilib.
Bütün bunlar yaxın illərdə də hibrid avtomobillərin həm satış, həm də idxal göstəricilərinin daha da artacağını deməyə əsas verir.
