AccessBank
2025-ci ilin son 3 ayında AccessBank depozit faizləri üzrə ciddi dəyişikliklər edib. Bank valyuta bazarında yaranan vəziyyətə uyğun olaraq, dollar əmanətləri üzrə faiz dərəcələrini əhəmiyyətli dərəcədə azaldıb.
AzPost xəbər verir ki, Bankın rəsmi açıqlamasına görə, aylıq ödəniş şərti ilə 6 aylıq dollar depozitlərinin faizi 3,5%-dən 1%-ə, 12 aylıq depozitlərin faizi isə 4%-dən 2%-ə enib. Həmçinin 18 və 24 aylıq depozitlər üzrə faizlər 3,5%-dən 2%-ə qədər aşağı salınıb.
Gəliri müddətin sonuna ödənilmək şərti ilə olan dollar əmanətlərində də oxşar azalmalar müşahidə olunur. 6 aylıq depozit üzrə faizlər 4%-dən 1,5%-ə, 12 aylıq üzrə 4,5%-dən 2,3%-ə, 18 aylıq üzrə 4%-dən 2,4%-ə, 24 aylıq üzrə isə 4%-dən 2,5%-ə endirilib.
Qeyd edək ki, may ayında AccessBank manat depozitləri üzrə faizləri 0,75%-ə qədər azaltmışdı. Bu dəyişikliklər bankın valyuta bazarındakı riskləri azaltmaq və likvidlik vəziyyətini balanslaşdırmaq məqsədi ilə həyata keçirilir.
Son üç ayda bank sektorunda likvidlik və faiz siyasətində müşahidə olunan dəyişikliklər, AccessBank-ın da strateji yanaşmasını əks etdirir. Ekspertlər bildirirlər ki, dollar depozitlərinin faizlərinin azalması bazardakı dollara tələbin azaldığını və bankların risk idarəetməsini optimallaşdırdığını göstərir.
AccessBank 2002-ci ildə təsis olunub və Azərbaycanda mikro və kiçik sahibkarlara yönəlmiş xidmətləri ilə seçilir. Bankın əsas fokus sahələri arasında kiçik biznesin maliyyələşdirilməsi, əmanət və kredit məhsulları yer alır. Ölkə üzrə geniş filial şəbəkəsi ilə fəaliyyət göstərən AccessBank, həmçinin rəqəmsal bankçılıq xidmətlərinə böyük önəm verir.
