İran nüvə
İranın nüvə proqramı ilə bağlı narahatlıqlar yenidən alovlanıb. AzPost xəbər verir ki, ABŞ-ın Middlebury Beynəlxalq Tədqiqatlar İnstitutunun Nüvə Tədqiqatlar Mərkəzi İranın zənginləşdirilmiş uran ehtiyatları və yeraltı nüvə obyektləri ilə bağlı ciddi xəbərdarlıq yayıb.
Məlumata görə, İran hələ də 400 kiloqram 60 faizlik zənginləşdirilmiş uran saxlayır və bu materialın hazırda harada yerləşdiyi dəqiq bilinmir. Bu isə beynəlxalq müşahidəçilər üçün təhlükənin real olduğunu göstərir.
Tədqiqatçılar bildirirlər ki, İsraillə gərginliyin artdığı bir dövrdə belə, İsfahanda yerləşən yeraltı komplekslərə zərbələr ya endirilməyib, ya da minimal təsir göstərilib. Ehtimallar göstərir ki, bu kompleksdə müəyyən qədər uran ehtiyatı saxlanılır.
Bundan əlavə, İranın Natanz şəhəri yaxınlığında 10 min kvadratmetrlik yeni yeraltı nüvə obyektinə malik olduğu, bu sahənin də hədəf alınmadığı qeyd olunur. Bu obyektin dərinliyi və mühafizə səviyyəsi ilə hətta Fordu nüvə obyektindən belə daha təhlükəli olduğu ehtimal edilir.
Hesabatda daha iki qeyri-rəsmi, gizli zənginləşdirmə sahəsinin də ölkə daxilində mövcud ola biləcəyi və istənilən anda sürətli təchizatla nüvə silahı istehsalına uyğunlaşdırıla biləcəyi vurğulanır.
Ekspertlər bildirirlər ki, hazırda İranın əlindəki 400 kq yüksək zənginləşdirilmiş uranı (HEU) sadəcə iki ay ərzində silah səviyyəsinə (90%) çatdırmaq mümkündür. Əgər bu proses davam etsə, İran beş ay ərzində nüvə bombası hazırlaya bilər.
Tədqiqat mərkəzi həmçinin qeyd edir ki, bu ehtiyatların gizlədilməsi və strateji obyektlərin dərin yeraltı məkanlarda yerləşməsi İranın nüvə proqramına nəzarəti daha da çətinləşdirib.
