Qəzzada
İsrail ordusunun Qəzza zolağına gecə saatlarında endirdiyi hava zərbələri nəticəsində azı iyirmi bir nəfər öldürülüb.
AzPost xəbər verir ki, məlumatı Qətərin “Al Jazeera” telekanalı yayıb.
Hücumlar əsasən Qəzza şəhərinin şimal hissəsində yerləşən və məcburi köçkünlərin məskunlaşdığı çadır düşərgəsini hədəf alıb. Eyni zamanda şəhərin mərkəzi hissələrində də bir neçə yaşayış ərazisi bombalanıb.
Hadisə yerində dağıntıların miqyası hələlik tam müəyyənləşdirilməyib. Lakin yerli mənbələr həyatını itirənlərin sayının artacağından narahatlıq bildirir. Hücum zamanı bir neçə uşaq və qadının da həlak olduğu qeyd olunub.
Qəzza Səhiyyə Nazirliyi hadisə ilə bağlı hələlik rəsmi açıqlama yaymasa da, Fələstin Qızıl Aypara Cəmiyyəti zərərçəkənlərin təcili tibbi yardıma ehtiyacı olduğunu bildirib.
İsrail tərəfi isə bu əməliyyatların “HƏMAS infrastrukturlarını hədəfə aldığı” iddiasını irəli sürüb.
Xatırladaq ki, bölgədəki hərbi gərginlik son həftələrdə yenidən intensivləşib və mülki itkilər sürətlə artır.
