Senat
ABŞ Senatında respublikaçı qanad Donald Trampın Rusiya prezidenti Vladimir Putinə qarşı sərt mövqeyini alqışlayıb. AzPost-un Axios portalına istinadla məlumatına görə, xüsusən də respublikaçı “şahinlər” Trampın son açıqlamalarını müsbət qarşılayıblar.
Senator Con Kornin mediaya açıqlamasında bildirib: “Mən çox şadam ki, prezident Tramp Putinin onu aldatdığını nəhayət başa düşüb”. Onun sözlərinə görə, Rusiya liderinin davranışı uzun müddətdir ABŞ üçün təhlükə mənbəyidir və Trampın mövqeyindəki dəyişiklik müsbət siqnaldır.
Senator Lindsey Graham isə deyib ki, Ağ Ev sahibi nəhayət “Putinin oynadığı oyunları” düzgün qiymətləndirib. O, Senatda Rusiya Federasiyasına qarşı yeni “sarsıdıcı sanksiyalar” layihəsinin hazırlanıb yekun mərhələyə çatdığını və yaxın vaxtlarda qəbul ediləcəyini də qeyd edib.
Qeyd edək ki, iyulun əvvəlində ABŞ mediası Vaşinqtonun Ukraynaya silah və sursat tədarükünü ehtiyat çatışmazlığı səbəbindən dayandırdığı barədə məlumat yaymışdı. Lakin Axios iyulun 8-də xəbər verib ki, ABŞ prezidenti Donald Tramp Ukraynaya əlavə olaraq 10 ədəd “Patriot” hava hücumundan müdafiə sistemi göndərmək niyyətindədir.
Kremlin mövqeyi isə dəyişməz qalıb. Prezidentin mətbuat katibi Dmitri Peskov bildirib ki, Ukraynaya silah tədarükünün azalması “xüsusi hərbi əməliyyatın” daha tez sona çatması üçün şərtdir. Xarici işlər naziri Sergey Lavrov isə vurğulayıb ki, Ukraynaya göndərilən istənilən hərbi yük Rusiya Silahlı Qüvvələri üçün qanuni hədəf sayılır.
Rusiya Xarici İşlər Nazirliyi isə NATO ölkələrinin Kiyevə silah göndərməsini “odla oyun” adlandırıb və bunun regionda vəziyyəti daha da gərginləşdirəcəyini açıqlayıb.
