Kapital Bank
Vətəndaş Elmin Əhmədov heç vaxt fiziki kart istifadə etmədiyi halda Kapital Bank tərəfindən ona borc yazıldığını iddia edir.
AzPost bildirir ki, o bu barədə sosial şəbəkə hesabında məlumat yayıb. Elmin Əhmədov keçən ilin sonlarında onlayn qaydada rəqəmsal (digital) kart sifariş etdiyini, bank əməkdaşlarının kartı aktiv etdiyini və bu andan sonra problemlərin başladığını deyir.
Onun sözlərinə görə, digital kartı Birbank mobil tətbiqinə əlavə edə bilməsi üçün fiziki kart əldə etməli olduğu bildirilib. Halbuki müştəri digital kartı sifariş edərkən bank filialına getməmək üçün bunu etdiyini deyir.
Bir ay öncə yenidən bank kartı sifariş etmək istədikdə, ona əvvəlki kart üzrə borc olduğu üçün yeni sifarişin mümkün olmadığı bildirilib.
Araşdırma zamanı müştəriyə bildirilib ki, onun adına 18 manat məbləğində borc var. Səbəb kimi isə əvvəl sifariş etdiyi, lakin istifadə etmədiyi kart üzrə SMS bildiriş xidmətinin aktivləşdirilməsi göstərilib.
“Mən heç vaxt fiziki şəkildə bu kartdan istifadə etməmişəm. Necə olur ki, istifadə olunmamış karta görə mənə borc yazılır?” – deyə vətəndaş əlavə edib.
Məsələ ilə bağlı bank tərəfindən müştərinin şikayətinin araşdırılması üçün şəxsi məlumatları istənilib. Lakin vətəndaş buna imtina edərək “50 dəfə müraciət etmişəm və həmişə eyni cavabı almışam” deyə münasibət bildirib.
