Niderland hökuməti Çin şirkəti Nexperia üzərində birbaşa nəzarəti ələ alıb. AzPost xarici mediaya istinadla xəbər verir ki, qərar milli təhlükəsizlik və texnoloji zəncirin qorunması məqsədi ilə qəbul olunub.
Rəsmi açıqlamada bildirilir ki, hökumət “milli malların əlçatanlığı haqqında” qanunun müddəalarını Nexperia şirkətinə qarşı tətbiq edib. Bu addım “idarəetmədə ciddi pozuntuların” aşkar edilməsindən sonra atılıb.
Məlumata görə, sözügedən pozuntular ölkənin və bütövlükdə Avropa İttifaqının texnoloji davamlılığına və strateji istehsal zəncirinə təhlükə yarada bilər. Rəsmi Haaqa bu qərarla gələcəkdə Avropa iqtisadi maraqlarına zərər vura biləcək qərarların qarşısını almağı hədəfləyir.
Qeyd edək ki, Nexperia Avropanın ən iri yarımkeçirici istehsalçılarından biridir və əsasən avtomobil sənayesi ilə məişət elektronikası üçün mikroçiplər istehsal edir. Şirkət Çinin Wingtech konserninə məxsusdur.
Avropa ekspertlərinin fikrincə, bu addım Brüsselin və Avropa dövlətlərinin Çinə texnoloji asılılığı azaltmaq istiqamətində atdığı növbəti strateji addımlardan biri kimi qiymətləndirilir.
