VTB Bank Azərbaycan
VTB Bank-dan götürülən kreditlə bağlı sosial şəbəkələrdə narazılıq paylaşılıb. AzPost xəbər verir ki, Qərib Qocayev adlı istifadəçi bankdan 2021-ci ildə götürdüyü kreditin illər keçməsinə baxmayaraq hələ də bitmədiyini bildirir.
İstifadəçinin sözlərinə görə, o, son beş il ərzində kredit üzrə mütəmadi ödənişlər edib və aylıq olaraq 130–150, bəzi hallarda isə 200 manata yaxın məbləğ ödəyərək borcu daha tez bağlamağa çalışıb. Lakin buna baxmayaraq, kreditin əsas borcunun gözlənildiyi kimi azalmaq əvəzinə demək olar ki, yerində qaldığını iddia edir.
Q.Qocayev qeyd edir ki, son ödənişlərdən birində 130 manat köçürdüyü halda borc məbləğinin 1 394 manatdan cəmi 1 380 manata düşdüyünü görüb. Onun sözlərinə görə, bu halda ödənişdən cəmi 14 manat əsas borcdan silinib, qalan məbləğ isə dəyişməz qalıb. İstifadəçi hesab edir ki, “toxunulmaz” kimi göstərilən əsas borcun uzun müddət azalması başa düşülən deyil.
Şikayətçi əlavə edir ki, ilkin olaraq bankdan təxminən 7 000 manat kredit götürüb, lakin indiyədək çeklərə əsasən artıq 10 000 manata yaxın ödəniş edib. Buna baxmayaraq, kreditin hələ də tam bağlanmaması onda ciddi narazılıq yaradıb və bu vəziyyəti izah etməkdə çətinlik çəkdiyini bildirib.
Paylaşımda vurğulanır ki, müştəri kredit şərtləri, faiz hesablanması və əsas borcun niyə bu qədər ləng azalması ilə bağlı aydın məlumat ala bilmir. O, bu səbəbdən VTB Bank-dan kredit götürməsini səhv qərar kimi qiymətləndirdiyini də qeyd edib.
VTB Bank tərəfindən sözügedən iddialarla bağlı hələlik rəsmi açıqlama verilməyib.
