Fransada fermerlər Avropa İttifaqı ilə Cənubi Amerikanın “Merkosur” ticarət bloku arasında bağlanması planlaşdırılan azad ticarət sazişinə qarşı kütləvi etiraz aksiyası keçiriblər. AzPost xəbər verir ki, bu barədə RİA Novosti məlumat yayıb.
Məlumata görə, yüzlərlə fransız fermer traktorlarla Parisin mərkəzinə daxil olaraq bayraqlar və plakatlarla Dvorets İnvalidov istiqamətində yürüş ediblər. Aksiya zamanı traktorların səs siqnalları ilə paytaxtda nəqliyyatın hərəkəti çətinləşib. Fermerlər Avropa İttifaqının kənd təsərrüfatı siyasətinə yenidən baxılmasını və sözügedən sazişin dayandırılmasını tələb ediblər.
Etirazların əsas səbəbi Avropa Komissiyasının sədri Ursula fon der Lyayenin yanvarın 17-də Paraqvaya səfər edərək Avropa Parlamenti səsverməsi keçirilmədən sazişi imzalamağa hazırlaşmasıdır. Fransız və digər Avropa ölkələrinin fermerləri hesab edirlər ki, bu addım kənd təsərrüfatı sektorunda ciddi problemlərə yol aça bilər.
Aqrarlar bildirirlər ki, Mərkosur ölkələrindən Avropa bazarına daxil olacaq ucuz kənd təsərrüfatı məhsulları yerli istehsalçıların satışını azalda bilər. Onların fikrincə, Cənubi Amerika ölkələrində ekoloji və sanitariya tələbləri Avropa standartlarından daha zəifdir və bu da “ədalətsiz rəqabət” yaradır.
Qeyd edək ki, böhran xüsusilə 2024-cü ilin dekabrında Ursula fon der Lyayenin Montevideoda 700 milyondan çox istehlakçını əhatə edən, dünyanın ən iri azad ticarət zonalarından birinin yaradılmasına dair razılaşmanı imzalamasından sonra daha da dərinləşib. Fermerlər bu razılaşmanın Avropada kənd təsərrüfatı sektoruna ciddi zərbə vuracağından ehtiyat edirlər.
Məlumata görə, Mərkosur birliyinə Argentina, Braziliya, Paraqvay, Uruqvay və Boliviya daxildir. Təşkilat 1991-ci ildə yaradılıb və hazırda Cənubi Amerikanın ümumi daxili məhsulunun böyük hissəsini əhatə edir.
