ABŞ-ın “Havana sindromu” adlandırılan simptomlara səbəb ola biləcək silaha malik olduğu iddia olunur. AzPost xəbər verir ki, bu barədə amerikalı jurnalist, ABŞ Dövlət Departamentinin və NPR radiosunun keçmiş əməkdaşı Saşa İnqber məlumat yayıb.
Jurnalistin yazdığına görə, ABŞ hökumətinin sərəncamında olan və bir neçə ay əvvəl xüsusi əməliyyat zamanı əldə edildiyi deyilən naməlum qurğu artıq sınaqdan keçirilib və hazırda Pentaqonun nəzarətindədir. İnqber bu iddiaları Substack platformasında paylaşdığı yazısında mənbələrinə istinadən irəli sürüb.
Məlumata əsasən, sosial şəbəkələrdə Venesuela prezidenti Nikolas Maduronun mühafizə xidmətinin guya keçmiş əməkdaşına aid müsahibə yayılıb. Həmin müsahibədə iddia olunur ki, ölkə rəhbərinə qarşı baş vermiş insident zamanı mühafizəçilər naməlum üsulla “fəaliyyətsiz vəziyyətə” salınıb. Bu müsahibənin repostunu Ağ Evin mətbuat katibi Kerolin Levittin də paylaşdığı bildirilir.
İnqber qeyd edir ki, bu məlumatlardan sonra o, öz mənbələri ilə əlaqə saxlayıb və onlardan bəziləri ABŞ hökumətinin “Havana sindromu”na səbəb ola bilən qurğuya malik olduğunu təsdiqləyib. Başqa bir mənbənin fikrincə isə, sözügedən cihaz xüsusi əməliyyat zamanı ələ keçirilməyib, sadəcə satın alınıb.
Xatırladaq ki, “Havana sindromu” adlanan vəziyyət başgicəllənmə, ürəkbulanma, baş ağrıları və eşitmə problemləri ilə müşayiət olunur. Bu simptomlar ilk dəfə 2016–2017-ci illərdə Kubada çalışan ABŞ diplomatlarında müşahidə edilib. Daha sonra oxşar hallar 2018-ci ildə Çində, eləcə də Avstriya, Afrika ölkələri, Tacikistan və Rusiyada qeydə alınıb.
ABŞ Mərkəzi Kəşfiyyat İdarəsinin direktoru Uilyam Börnsün açıqlamasına görə, bu sindromdan yüzlərlə amerikalı diplomat və dövlət qulluqçusu zərər çəkib. Rəsmi Vaşinqton isə indiyədək “Havana sindromu”nun dəqiq səbəbi ilə bağlı birmənalı mövqe ortaya qoymayıb.
