2026-cı ildə dünyanı yeni miqyaslı pandemiya təhlükəsi gözləyə bilər. Daily Star nəşrinin yazdığına görə, bir neçə virusun yayılması nəticəsində elmə hələlik məlum olmayan “X patogeni”nin ortaya çıxma ehtimalı mövcuddur.
AzPost xəbər verir ki, mütəxəssislərin fikrincə, bu risk əsasən əhali arasında peyvəndlənmə səviyyəsinin kəskin azalması və virusların mutasiya qabiliyyətinin artması ilə bağlıdır. Potensial təhlükə yaradan viruslar sırasında meymunçiçəyi, məxmərək, quş qripi və Oropuş qızdırması göstərilir.
Böyük Britaniyanın Sauthempton Universitetinin qlobal səhiyyə üzrə tədqiqatçısı Maykl Hed bildirib ki, hazırda bu infeksiyalar üzrə dünyanın müxtəlif bölgələrində yoluxma hallarında artım müşahidə olunur. Onun sözlərinə görə, xüsusilə meymunçiçəyi virusu artıq nadir haldan çıxaraq bir çox ölkədə yayılıb və yeni ştammlar meydana gəlir.
Ekspertlər eyni zamanda məxmərəyin də geri qayıda biləcəyindən narahatdırlar. Bildirilir ki, qızılca, epidemik parotit və məxmərəyə qarşı qoruma təmin edən MMR peyvəndindən istifadə son 15 ilin ən aşağı səviyyəsinə enib.
Qlazqo Universitetinin molekulyar və hüceyrə virologiyası üzrə professoru Ed Hatçinson isə quş qripi virusunun (H5N1) yüksək mutasiya qabiliyyətinə malik olduğunu qeyd edib. Onun sözlərinə görə, virus artıq quşlardan məməlilərə, o cümlədən iribuynuzlu heyvanlara keçə bilir və bu da yoluxma riskini artırır.
Mütəxəssislər diqqətə çatdırırlar ki, Oropuş virusu da risk mənbəyi olaraq qalır. Bu virus əsasən yoluxmuş xırda qanadsoran həşəratların dişləməsi ilə ötürülür və Şimali və Cənubi Amerikada yayılma arealını genişləndirə bilər.
Materialda vurğulanır ki, sadalanan infeksiyaların hər biri nəzəri olaraq yeni və naməlum “X virusu”nun yaranmasına zəmin yarada bilər. Bu isə qlobal səhiyyə sistemi üçün ciddi çağırış hesab olunur.
