Cənubi Koreyanın sabiq prezidenti Yun Sok Yol məhkəmə qərarı ilə 5 il müddətinə azadlıqdan məhrum edilib. AzPost xəbər verir ki, bu barədə TASS agentliyi məlumat yayıb.
Seulun Mərkəzi Dairə Məhkəməsinin 16 yanvar 2026-cı il tarixli qərarına əsasən, Yun Sok Yol həbs qərarının icrasına mane olmaqda təqsirli bilinib. Məhkəmə prosesi Yonhap News TV telekanalı vasitəsilə canlı yayımlanıb. Bu hökm sabiq dövlət başçısına qarşı açılmış cinayət işləri üzrə çıxarılan ilk məhkəmə qərarıdır.
Məlumata görə, prokurorluq Yun Sok Yol üçün 10 il həbs cəzası tələb edib. İttiham aktına ümumilikdə yeddi maddə daxil olub. Onlar arasında dövlət orqanlarının fəaliyyətinə mane olma, vəzifə səlahiyyətlərindən sui-istifadə, saxta sənədlərin hazırlanması, prezident mühafizəsi və dövlət arxivləri haqqında qanunların pozulması yer alıb.
Məhkəmə müəyyən edib ki, 3 yanvar 2025-ci ildə Yun Sok Yolun göstərişi ilə Prezident Mühafizə Xidməti hüquq-mühafizə orqanlarının əməkdaşlarını Seuldakı prezident iqamətgahına buraxmayıb. Həmin vaxt onun barəsində hərbi vəziyyətin elan edilməsi ilə bağlı cinayət işi üzrə həbs qərarı mövcud olub. Nəticədə həbs yalnız 15 yanvar 2025-ci ildə, ikinci cəhddə həyata keçirilib. Bu vaxta qədər Yun Sok Yolun səlahiyyətləri parlament tərəfindən 2024-cü ilin dekabrında impiçment yolu ilə dayandırılmışdı.
Məhkəmə həmçinin müəyyən edib ki, sabiq prezident 3 dekabr 2024-cü ildə hərbi vəziyyətlə bağlı keçirilən iclasa yeddi naziri dəvət etməyərək onların hüquqlarını pozub. Bundan əlavə, o, fövqəladə vəziyyət haqqında yenilənmiş bəyannamə layihəsi hazırlayıb və qorunan serverlərdə saxlanılan telefon danışıqlarının qeydlərini məhv etməyə cəhd göstərib.
Qeyd olunub ki, Korrupsiyaya Qarşı Mübarizə İdarəsinin üsyan faktı üzrə istintaq aparmaq səlahiyyəti olub və buna görə də prezident iqamətgahında aparılan axtarış və həbs qərarı qanuni sayılıb.
Məlumata əsasən, Yun Sok Yol hazırda səkkiz cinayət işi üzrə təqsirləndirilən şəxs qismində çıxış edir. Onlardan dördü 3 dekabr 2024-cü ildə konstitusiyaya zidd hesab edilən hərbi vəziyyətin elan edilməsi ilə bağlıdır. Konstitusiya Məhkəməsi 2025-ci ilin aprelində impiçmenti rəsmən təsdiqləyib.
Bundan əlavə, 13 yanvar 2026-cı ildə xüsusi prokuror əsas “üsyan” işi üzrə Yun Sok Yol üçün ölüm cəzası tələb edib. Cənubi Koreya Cinayət Məcəlləsinə əsasən, bu maddə üzrə yalnız ölüm cəzası və ya ömürlük həbs nəzərdə tutulur.
