Bank kartlarından vəsaitin çıxılması, bloklanması və geri qaytarılmasının gecikməsi ilə bağlı vətəndaşlarda narazılıqlar artıb. AzPost xəbər verir ki, belə hallarda emosional reaksiya verməkdən əvvəl prosedur qaydalarını və hüquqları bilmək vacibdir.
Azərbaycan qanunvericiliyinə əsasən, ödəniş əməliyyatları düzgün və vaxtında icra olunmalıdır. “Ödəniş xidmətləri və ödəniş sistemləri haqqında” qanuna görə, müştəri hesabından səhv və ya əsassız vəsait çıxıldığını hesab edirsə, dərhal banka məlumat verməlidir. Bank isə müraciəti qəbul edib araşdırma aparmağa borcludur.
Bəzi hallarda vəsait faktiki olaraq çıxılmır, sadəcə bloklanır. Bu, xüsusilə mehmanxana bronu, onlayn alış və ya xarici xidmətlər zamanı baş verə bilər. Xidmət göstərən tərəf məbləği təsdiqləmədikdə və ya geri qaytardıqda, bank həmin vəsaiti daxili hesablaşma mərhələsindən keçirdikdən sonra müştərinin balansına qaytarır. Bu proses müəyyən vaxt ala bilər. Lakin bank müştəriyə əməliyyatın hansı mərhələdə olduğunu və təxmini müddəti izah etməlidir.
Qanunvericiliyə görə, bank müştərinin müraciətini rəsmi qaydada qeydiyyata almalı və əsaslandırılmış cavab verməlidir. Əgər vətəndaş müraciətinə cavab ala bilmirsə və ya cavab onu qane etmirsə, o zaman nəzarət orqanına – Azərbaycan Respublikasının Mərkəzi Bankına rəsmi şikayət ünvanlaya bilər. Mərkəzi Bank maliyyə qurumlarının fəaliyyətinə nəzarət edir və vətəndaş müraciətlərini araşdırmaq səlahiyyətinə malikdir.
Hüquqşünaslar bildirirlər ki, belə hallarda şifahi deyil, yazılı müraciət etmək daha məqsədəuyğundur. Müraciətin qeydiyyat nömrəsini saxlamaq, cavab müddətini tələb etmək və bütün sənədləri qorumaq vətəndaşın hüquqlarının müdafiəsi baxımından vacibdir.
Bank–müştəri münasibətləri müqavilə əsasında qurulur və tərəflərin hüquq və öhdəlikləri qanunla tənzimlənir. Məlumatlı vətəndaş həm vaxt itkisini azalda, həm də mümkün mübahisələri hüquqi müstəvidə daha effektiv şəkildə həll edə bilər.
