Azərbaycanda texnologiya nəhənglərinin rəsmi dilerləri və servis mərkəzləri ilə bağlı şikayətlərin ardı-arası kəsilmir. AzPost xəbər verir ki, bu dəfə sosial şəbəkə istifadəçisi Mehdi Nuruzadənin üzləşdiyi xoşagəlməz hadisə, həm Samsung Azerbaijan, həm də Kontakt Home şəbəkəsinin müştəri xidmətlərindəki ciddi boşluqları üzə çıxarıb.
“15 dəqiqəyə düzələn telefonu ‘detal yoxdur’ deyib qaytardılar”
Şikayətçinin sözlərinə görə, hələ satış vitrinlərində olan ən son model — Samsung S25 Ultra smartfonunda yaranan nasazlıqla bağlı əvvəlcə Kontakt Home-a, oradan isə rəsmi Samsung servisinə yönləndirilib. Servis mərkəzi telefonu bir gün saxladıqdan sonra “ehtiyat hissəsi yoxdur” bəhanəsi ilə cihazı təmir etməkdən imtina edib.
Lakin məsələnin ən maraqlı tərəfi bundan sonra başlayıb. Rəsmi servisin “düzəlmir” dediyi telefonu, vətəndaş cəmi 10 metr kənardakı adi təmir məntəqəsində, heç bir detal dəyişdirilmədən, cəmi 15 dəqiqəyə düzəltdirib.
Etika və peşəkarlıq problemi
Şikayətdə servis əməkdaşlarının müştəri ilə rəftarı da kəskin tənqid olunub. Vətəndaş bildirir ki, yağışlı havada məsafə qət edərək kömək istədiyi halda, əməkdaşlar qeyri-etik davranışlar nümayiş etdirib, suallara isə “get harda düzəldirsən düzəlt” tipli qeyri-peşəkar cavablar veriblər.
Ortaya çıxan 4 ciddi sual:
Baş vermiş hadisə fonunda həm istehlakçılar, həm də media tərəfindən rəsmi tərəfdaşlara ünvanlanan suallar cavabsız qalır:
-
Texniki bacarıqsızlıq: Sıravi ustanın 15 dəqiqəyə həll etdiyi problemi rəsmi servis niyə görə bilmir?
-
Süni detal tələbi: Detal dəyişmədən düzələn nasazlıq üçün müştəridən niyə ehtiyat hissəsi gözləmək tələb olunur?
-
Logistika boşluğu: Hələ zəmanət müddəti bitməmiş və yeni satışa çıxmış modelin ehtiyat hissəsi niyə anbarlarda yoxdur?
-
Məsuliyyətdən qaçma: Kontakt Home niyə müştərisini problemlə təkbaşına buraxır?
Vətəndaşın son sözü kəskin olub: “Samsung almayın, aldırtdırmayın”. Bu cür hallar göstərir ki, brend nə qədər böyük olsa da, yerli nümayəndəliklərin servis xidməti və müştəri məmnuniyyəti aşağı səviyyədə olduqda, markanın nüfuzu sarsılır.
Məsələ ilə bağlı qarşı tərəflərin də mövqeyini dərc etməyə hazırıq.
