Tibbi dildə “kserostomiya” adlanan ağız quruluğu, sadəcə tüpürcək çatışmazlığı deyil, orqanizmdə gizli gedən bir çox patoloji proseslərin ilkin simptomu hesab olunur.
Tüpürcək vəzilərinin fəaliyyətinin zəifləməsi nəinki qidanın həzmini çətinləşdirir, həm də ağız boşluğunda bakteriyaların sürətlə artmasına şərait yaradır. AzPost xəbər verir ki, mütəxəssislər ağız quruluğunun ən çox rast gəlinən səbəbi kimi endokrin sistem pozğunluqlarını, xüsusilə şəkərli diabeti qeyd edirlər. Almaniyalı terapevt Tomas Meyer bildirir ki, qanda qlükozanın yüksək olması toxumalardan mayenin çəkilməsinə səbəb olur ki, bu da xəstədə xroniki ağız quruluğu və qarşısıalınmaz su içmək istəyi yaradır.
Şəkərli diabetdən başqa, bu hal autoimmun xəstəlik olan Şeqren sindromunun əsas əlamətidir ki, bu zaman orqanizmin immun sistemi səhvən öz tüpürcək və göz yaşf vəzilərinə hücum edir. Həmçinin, hipertoniya, depressiya və allergiya əleyhinə qəbul edilən bir çox dərman preparatlarının yan təsiri kimi ağızda quruluq müşahidə oluna bilər. Mütəxəssislərin rəyinə görə, bəzən ağız quruluğu qaraciyər və öd kisəsi xəstəlikləri, eləcə də kəskin vitamin çatışmazlığı (xüsusilə A və B qrupu vitaminləri) zamanı orqanizmin verdiyi ilk SOS siqnalıdır.
Stomatoloqlar xəbərdarlıq edirlər ki, uzunmüddətli ağız quruluğu diş minasının sürətlə korlanmasına və damaq iltihabına yol açdığı üçün mütləq kompleks müayinə tələb edir. Əgər bu simptom gecə saatlarında kəskinləşirsə və boğaz ağrısı ilə müşayiət olunursa, bu, tənəffüs sistemindəki problemlərdən və ya daxili orqanların intoksikasiyasından xəbər verə bilər. Tədqiqatçılar vurğulayırlar ki, gündəlik su normasını bərpa etmək və zərərli vərdişlərdən uzaq durmaq müvəqqəti rahatlıq versə də, quruluğun köklü səbəbini tapmaq üçün qan analizi və ultrasəs müayinəsi vacibdir. Nəticə etibarilə, ağız quruluşu kiçik bir narahatlıq kimi görünsə də, o, bədənimizdəki mürəkkəb biokimyəvi balansın pozulduğuna dair ciddi bir xəbərdarlıq rolunu oynayır.
