Rusiya İstintaq Komitəsinin yaydığı məlumata görə, Çukotka Muxtar Dairəsinin Mülki Müdafiə və Yanğından Mühafizə İdarəsinin rəis müavini vəzifəsində çalışmış sabiq məmur məhkəmə qarşısına çıxarılıb. O, azyaşlı uşağın ölümü ilə nəticələnən səhlənkar fəaliyyətdə təqsirli bilinib.
Azpost MK-ya istinadla xəbər verir ki, istintaq müəyyən edib ki, Krest körfəzi akvatoriyasında səkkiz yaşlı qız uşağının buzun altına düşməsi barədə məmura məlumat daxil olub. Həmin vaxt axtarış-xilasetmə idarəsinin rəhbəri vəzifəsini icra edən şəxs lazımi xilasetmə əməliyyatını, o cümlədən aviasiya vasitələrinin cəlb olunmasını təşkil etməyib.
Nəticədə kömək gözləyən uşaq bədənin hədsiz soyuması (hipotermiya) səbəbindən həyatını itirib. Məhkəmə sübuta yetirib ki, məhz məmurun öz vəzifə öhdəliklərinə laqeyd yanaşması bu faciəyə yol açıb.
Məhkəmənin qərarı ilə sabiq məmur 2 il müddətinə məskunlaşma koloniyasında cəza çəkməyə məhkum edilib. Bundan əlavə, ona 2 il müddətində dövlət orqanlarında inzibati və təsərrüfat funksiyaları ilə bağlı rəhbər vəzifə tutmaq qadağan edilib.
