20-dən çox İran gəmisi ABŞ-ın Hörmüz boğazındakı dəniz blokadasını yarıb.
Azpost.info-nun məlumatına görə, bu barədə SEPAH-a bağlı Telegram kanalı Lloyd’s məlumat bazasına istinadən bildirib.
“Lloyd’s məlumat bazasına görə, İranın “kölgə donanması” ilə əlaqəli ən azı 26 gəmi ABŞ tərəfindən tətbiq edilən blokadanı uğurla keçib”, – deyə məlumatda bildirilir.
Fars xəbər agentliyi həmçinin “Trackers” tankerinin blokadanı yardığını bildirib. Tanker İran Milli Neft Gəmiçiliyinə məxsusdur. Gəmi 2026-cı ilin mart ayının sonlarında İranı tərk edərək Riau adalarına yola düşüb və orada blokadadan yayınaraq evə qayıtmazdan əvvəl 2 milyon barel xam neft boşaldıb. Tankerin 22 apreldə Xarq adasına çatması planlaşdırılır.
Xatırladaq ki, İsrail və ABŞ 28 fevralda İrana qarşı hərbi əməliyyata başlayıblar. Buna cavab olaraq İslam Respublikası İsrailə və Yaxın Şərqdəki ABŞ hərbi bazalarına güclü zərbələr endirib. 40 günlük müharibədən sonra, 8 apreldə ABŞ prezidenti Donald Tramp İranla iki həftəlik atəşkəs elan edib və ardınca nəticəsiz başa çatan ilk danışıqlar raundu keçirilib. Bazar ertəsi, 20 apreldə Tehran amerikalıların razılaşmanı pozması səbəbindən Vaşinqtonla ikinci danışıqlar raundunda iştirak etməkdən imtina edib.
