Rusiya Prezidenti Vladimir Putinin hərəkətləri ətrafında yaranan informasiya boşluğu Qərb mətbuatında Kremlin rəhbərinin getdikcə artan paranoyası ilə bağlı yeni iddiaların yayılmasına səbəb olub.
Azpost.info xəbər verir ki, bu barədə Daily Star nəşri məlumat yayıb.
Bir sıra Qərb KİV-lərinin qapalı Telegram kanallarının monitorinqinə və xüsusi xidmət orqanlarından sızdırıldığı iddia olunan məlumatlara istinadən yazdığına görə, Vladimir Putin azı bir həftədir ki, faktiki olaraq Kremlin ciddi mühafizə olunan ərazisini tərk etmir və ölkə daxilində ictimai səfərlərdən tamamilə imtina edib.
Analitiklərin fikrincə, bu vəziyyət Ukraynanın pilotsuz uçuş aparatlarının həyata keçirdiyi dəqiq zərbələr və Rusiyanın dərin arxa cəbhəsində yüksək rütbəli hərbçilərin öldürülməsi fonunda Putinə qarşı mümkün sui-qəsd qorxusunun artması ilə əlaqələndirilir.
Tam etimadsızlıq mühiti
Bildirilir ki, daha əvvəl Financial Times və araşdırmaçı media qurumlarının əldə etdiyi, Avropa kəşfiyyat orqanlarının qapalı hesabatlarında Rusiyanın Federal Mühafizə Xidmətinin (FSO) Putin ətrafında təhlükəsizlik tədbirlərini görünməmiş dərəcədə sərtləşdirdiyi iddia olunur.
Məlumata görə şəxsi təmaslar minimuma endirilib. Putinə yaxın olan aşpazlar, fotoqraflar və şəxsi mühafizəçilər sutka ərzində videomüşahidə altındadır. Onlara internetə çıxışı olan mobil telefonlardan istifadə etmək qadağan edilib.
Səfərlərin coğrafiyası məhdudlaşdırılıb. Putinin Moskvaətrafı iqamətgahlara və ya Valdaya ənənəvi səfərlərinin əvəzinə, dərin mühafizə olunan yeraltı bunkerlərdə qalmağa üstünlük verdiyi iddia edilir.
Əsas narahatlıq daxili təhlükələrdir. Mənbələrin iddiasına görə, Kreml xarici təhdidlərdən daha çox siyasi elita daxilində mümkün sui-qəsd və pilotsuz uçuş aparatlarından istifadə edilərək dövlət başçısına qarşı hücum ehtimalından ehtiyatlanır.
İş qrafiki görüntüsü yaradılır
Məlumatda qeyd olunur ki, Putinin təcrid vəziyyətini ictimaiyyətdən gizlətmək üçün Kremlin mətbuat xidməti əvvəlcədən lentə alınmış görüşləri sonradan yayımlayaraq onları cari görüşlər kimi təqdim edir. Bununla yanaşı, rəsmi iş qrafikində Kremlin təcrid olunmuş zallarında, məşhur uzun masalar arxasında keçirilən azsaylı əyani görüşlər nümayiş etdirilir.
Bu görüşlərdə iştirakına icazə verilən azsaylı şəxslərdən biri Şimali Koreyanın xarici işlər naziri Çxve Son Xi olub. Məlumata görə, Putin protokol xarakterli görüş zamanı Pxenyana Ukrayna müharibəsində göstərdiyi hərbi dəstəyə görə təşəkkür edib. Lakin danışıqların məzmunu və iki ölkə arasında koordinasiyanın səviyyəsi barədə ətraflı məlumat açıqlanmayıb.
N.Talıbov
