Salyan rayonunda keçmiş kürəkənin qətlə yetirilməsi ilə nəticələnən ağır cinayət hadisəsi baş verib.
Azpost.info APA-ya istinadən xəbər verir ki, hadisə iyulun 29-na keçən gecə rayonun Şəkərli kəndində qeydə alınıb.
Məlumata görə, 1966-cı il təvəllüdlü Natiq Sadıqov sərxoş vəziyyətdə yaşadığı evin həyətində baş verən münaqişə zamanı keçmiş kürəkəni, 1980-ci il təvəllüdlü Famil Lətifovu ov tüfəngi ilə güllələyib. Nəticədə Famil Lətifov hadisə yerində həyatını itirib.
Polis əməkdaşlarının keçirdiyi əməliyyat-axtarış tədbirləri nəticəsində Natiq Sadıqov saxlanılaraq istintaqa təhvil verilib. Ondan cinayətin törədildiyi ov tüfəngi maddi sübut kimi götürülüb.
Faktla bağlı cinayət işi üzrə araşdırma aparılır.
Qeyd edək ki, hadisə barədə ilkin məlumatda Salyan rayonunun Şəkərli kəndində bir nəfərin odlu silahla qətlə yetirildiyi bildirilmişdi. Sonradan hadisənin təfərrüatları məlum olub.
