Manisa vilayətinin Salihli rayonunda yerləşən qədim Sard şəhərində təxminən 2 500 il yaşı olan, 2,2 metr hündürlüyündə mərmər gənc oğlan heykəli aşkar edilib.
Azpost.info-nun məlumatına görə, bu barədə Türkiyənin mədəniyyət və turizm naziri Mehmet Nuri Ersoy bildirib.
Türkiyə Mədəniyyət və Turizm Nazirliyinin Mədəni İrs və Muzeylər Baş İdarəsinin koordinasiyası ilə aparılan arxeoloji qazıntılar zamanı ayaqüstə təsvir edilmiş monumental mərmər heykəl üzə çıxarılıb.
Nazirin sözlərinə görə, heykəl eramızdan əvvəl V əsrin birinci yarısına aiddir və təxminən 2 500 il əvvələ aid edilir. “Sardda Anadolu arxeologiyasına işıq salacaq unikal bir kəşf etdik. Tapılan 2,2 metrlik mərmər heykəl öz monumental ölçüsü, yaxşı qorunması və incə işlənmiş detalları ilə həmin dövrün nadir heykəltəraşlıq nümunələrindən biridir”, – deyə Mehmet Nuri Ersoy bildirib.
Nazir qeyd edib ki, Roma dövründə heykəldən ikinci dərəcəli tikinti materialı kimi istifadə olunaraq sütunlu küçənin döşənməsində tətbiq edilib. Heykəlin üzü aşağı yerləşdirildiyi üçün onun əsas hissələri və incə detallarının əsrlər boyu qorunub saxlanılması mümkün olub.
Sunay Aydın
