ABŞ Müdafiə Nazirliyi naməlum anomal hadisələrlə (UAP) bağlı yeni materiallar yayımlayıb. Beşinci dəfə təqdim olunan topluya ümumilikdə 41 material daxil edilib.
Materialların 16-sı video, 22-si sənəd, 3-ü isə görüntüdür. Sənədlər Pentaqon, Federal Təhqiqatlar Bürosu (FBI), Mərkəzi Kəşfiyyat İdarəsi (CIA), Dövlət Departamenti və ABŞ prezident administrasiyası tərəfindən əldə edilmiş məlumatlardan ibarətdir.
Materialların ən qədimləri 1950-ci ilə, ən yeniləri isə 2026-cı ilə aiddir. Sənədlər ABŞ hökumətinin UAP məlumatlarının açıqlanması təşəbbüsü çərçivəsində rəsmi platformalarda dərc olunub. AARO-nun məlumat bazasında bu tip görüntülər “naməlum anomal hadisələr” kimi təqdim olunur və onların təbiəti barədə yekun nəticə çıxarılmadığı xüsusi vurğulanır.
Oman körfəzində sirli obyektlər
Yeni materialların ən diqqətçəkən hissəsini 2021-ci ilin sentyabrında Oman körfəzi üzərində qeydə alınmış bir hadisə ilə bağlı altı video təşkil edir.
ABŞ hərbi təlimləri zamanı AC-130J təyyarəsinin ekipajı infraqırmızı və elektro-optik sistemlərdə bir neçə işıqlı obyekt aşkarlayıb.
Hesabata görə, müşahidə müddətində bu tip obyektlərlə bağlı təxminən 25 hadisə qeydə alınıb.
Rəsmi hesabatda obyektlər “soyuq kürələr” (cold orbs) kimi təsvir edilir. Onların diametrinin təxminən 1,2 metr olduğu qiymətləndirilib.
Ekipajın məlumatına görə, obyektlər nisbətən aşağı hündürlükdə hərəkət edib və sürətləri təxminən 400-2100 km/saat arasında olub.
Onların davranışı da hərbçilərin diqqətini çəkib. Bildirilir ki, obyektlər kəskin manevrlər edib və ehtimal ki, təyyarənin bort silahından açılan atəşə reaksiya veriblər.
İki obyektin isə bir-biri ilə koordinasiyalı şəkildə hərəkət etdiyi, eyni vaxtda hündürlüyünü və aralarındakı məsafəni dəyişdirdiyi qeyd olunub.
Pilotlar onların hərəkətini birlikdə oynayan delfinlər qrupunun davranışı ilə müqayisə ediblər.
Görüntü mobil telefonla çəkilib
Pentaqonun yayımladığı materiallar arasında 26 saniyəlik video da var.
Görüntü AC-130J təyyarəsinin infraqırmızı sisteminin ekranından çəkilib. Lakin bu, sensorun orijinal video faylı deyil – ekran əlavə olaraq mobil telefon vasitəsilə lentə alınıb.
Bu detal görüntünün keyfiyyətinin və obyektin hərəkətinin qiymətləndirilməsində nəzərə alınmalı amillərdən biridir.
ABŞ-ın UAP üzrə rəsmi məlumat bazasında da bəzi görüntülərin müşahidə olunan obyektin həqiqi xüsusiyyətlərini müəyyənləşdirmək üçün kifayət qədər məlumat vermədiyi qeyd olunur. AARO bir sıra hallarda sensor effektləri, görüntü xüsusiyyətləri və digər amillərin obyektin hərəkətinin qeyri-adi görünməsinə səbəb ola biləcəyini bildirir.
2025-ci ildən daha bir görüntü
Yeni topluda daha yaxın tarixə aid material da var.
Söhbət 2025-ci ildə Yaxın Şərqdə yerləşən ABŞ hərbi platformasının elektro-optik və infraqırmızı avadanlığı tərəfindən qeydə alınmış 99 saniyəlik videodan gedir.
Material ABŞ Mərkəzi Komandanlığı tərəfindən Pentaqonun UAP-lərlə bağlı məlumatları araşdıran Bütün Domenlər üzrə Anomaliyaların Həlli Ofisinə (AARO) təqdim edilib.
Videoda müşahidə sistemi səmada və ya yer səthinin fonunda soldan sağa hərəkət edən nəzərəçarpan obyekti izləyir. Çəkiliş zamanı operator bir neçə dəfə görüntü rejimini və böyütmə səviyyəsini dəyişir.
Lakin hadisənin dəqiq koordinatları yayımlanan materiallarda göstərilməyib.
Bu, yadplanetli obyekt demək deyil
Pentaqonun UAP materiallarını açıqlaması sosial şəbəkələrdə tez-tez “UFO görüntülərinin təsdiqlənməsi” kimi təqdim edilir. Lakin rəsmi terminologiyada UAP avtomatik olaraq yadplanetli mənşəli obyekt demək deyil.
ABŞ-ın AARO qurumu UAP-ləri müşahidə olunan və ilkin mərhələdə dəqiq müəyyənləşdirilə bilməyən anomal hadisələr kimi araşdırır. Qurumun 2026-cı il üzrə statistikasında əvvəllər naməlum hesab edilən çoxsaylı hadisələrin sonradan peyk, şar, pilotsuz uçuş aparatı, təyyarə və digər obyektlərlə əlaqələndirildiyi göstərilir.
Bununla belə, bəzi hadisələr üzrə kifayət qədər məlumat olmadığı üçün yekun nəticə çıxarmaq mümkün olmur.
Pentaqonun yeni açıqlaması da bu baxımdan maraqlıdır: ABŞ hərbçilərinin müxtəlif sensorları tərəfindən qeydə alınmış obyektlərin bir hissəsi hələ də tam izah olunmayıb.
Yeni materialların yayımlanması isə Vaşinqtonun UAP hadisələri ilə bağlı məlumatların daha geniş şəkildə ictimaiyyətə təqdim edilməsi siyasətinin davam etdiyini göstərir.
