İş gününün sonunda ayaqlarda ağırlıq, topuq nahiyəsində yüngül şişkinlik və yorğunluq çox vaxt uzun müddət ayaqüstə qalmaq və ya oturmaqla əlaqələndirilir. Lakin bu əlamətlər mütəmadi təkrarlanırsa, xroniki venoz çatışmazlığın göstəricisi ola bilər.
Bu barədə Wellandfit məlumat yayıb.
1. Ayaqlarda ağırlıq və gərginlik
Venoz qan dövranı ilə bağlı problemlərin ilkin əlamətlərindən biri ayaqlarda ağırlıq və gərginlik hissidir. Narahatlıq adətən günün ikinci yarısında, uzun müddət ayaqüstə qaldıqda və ya hərəkətsiz vəziyyətdə olduqda artır.
Ayaqları bir qədər yuxarı qaldırmaq və yüngül hərəkət etmək bəzi hallarda müvəqqəti rahatlama verə bilər.
2. Axşam saatlarında təkrarlanan şişkinlik
Ayaq, topuq və baldır nahiyəsində günün sonunda mütəmadi yaranan şişkinlik venoz durğunluqla əlaqəli ola bilər.
Qan cazibə qüvvəsinin təsiri ilə aşağı ətraflarda toplanır. Venoz qapaqlar zəiflədikdə qanın ürəyə doğru normal hərəkəti çətinləşir.
Tək-tək yaranan şişkinlik müxtəlif səbəblərdən meydana çıxa bilər. Lakin problem davamlı xarakter alırsa, həkimə müraciət etmək lazımdır.
3. Varikoz damarları və dəridə dəyişikliklər
Damar problemlərinin daha görünən əlamətlərindən biri dərinin altında qabarıq və burulmuş varikoz damarlarının yaranmasıdır.
Proses irəlilədikcə dəridə quruluq, qabıqlanma, qaşınma və baldırların aşağı hissəsində qırmızı-qəhvəyi rəng dəyişiklikləri də meydana çıxa bilər.
Bu dəyişiklikləri yalnız estetik problem kimi qəbul etmək düzgün deyil.
4. Gecə qıcolmaları, yanma və keyimə
Ayaqlarda yanma, dartılma, iynələnmə və xüsusilə gecələr yaranan ağrılı qıcolmalar da damar problemləri ilə əlaqəli ola bilər.
Bu simptomların başqa səbəbləri də mümkündür. Lakin onlar ayaqlarda ağırlıq, şişkinlik və varikoz damarları ilə birlikdə müşahidə olunursa, müayinə olunmaq vacibdir.
5. Hansı halda təcili yardım lazımdır?
Bəzi simptomlar isə sadəcə venoz çatışmazlıq deyil, daha ciddi və təcili müdaxilə tələb edən vəziyyətə işarə edə bilər.
Bir ayağın qəfil və güclü şişməsi, ağrıması, dərinin qızarması və həmin nahiyədə temperaturun yüksəlməsi dərin ven trombozunun əlaməti ola bilər.
Əgər bu simptomlara qəfil nəfəs darlığı, sinə ağrısı, sürətli ürəkdöyünmə, huşun itməsi və ya qanlı öskürək qoşularsa, bu, ağciyər emboliyası ehtimalını göstərə bilər və təcili tibbi yardım tələb edir.
Ayaqlarda davamlı ağırlıq və şişkinlik yaşlanmanın və ya adi yorğunluğun qaçılmaz nəticəsi kimi qəbul edilməməlidir. Simptomlar təkrarlanırsa, səbəbini müəyyənləşdirmək üçün həkim müayinəsi vacibdir.
Sunay
