Rusiya xarici işlər naziri Sergey Lavrov Almaniyanın Leypsiq şəhərinin hava limanında minalanmış dronun aşkarlanmasından sonra Rusiyaya qarşı atdığı addımların “əsl müharibənin başlanğıcı” sayıla biləcəyini bildirib.
“Leypsiq, hava limanı… Orada hansısa dron tapdılar. Dedilər ki, bu, Rusiya dronudur, heç kim araşdırmağa başlamadı. Bu, ümumiyyətlə, böyük mənada belə bir əsl müharibənin başlanğıcıdır”, – deyə nazir təbliğatçı Pavel Zarubinə müsahibəsində bildirib.
Avqustun əvvəlində Leypsiq/Halle hava limanında partlayıcı maddələrlə təchiz edilmiş bir neçə dron aşkarlanıb. Onlardan biri Ukraynaya məxsus hərbi-nəqliyyat təyyarəsinin yaxınlığında, digəri isə hava limanının yaxınlığında tapılıb.
Almaniyanın daxili işlər naziri Aleksander Dobrindt “hibrid hücum”un icraçılarının Rusiya dövlət strukturlarının sifarişi ilə hərəkət etdiyini bildirib.
Bundan sonra Almaniya hakimiyyəti Rusiyanın Bonndakı baş konsulluğunun və Berlindəki “Rus Evi”nin bağlanması, eləcə də ölkəyə daxil olan Rusiya vətəndaşlarına nəzarətin sərtləşdirilməsi barədə qərar qəbul edib.
Lavrov Berlinin bu addımlarını da şərh edib. “Xatırlayıram ki, İkinci Dünya müharibəsi, daha doğrusu, Böyük Vətən müharibəsi başlamazdan əvvəl almanlar da öz diplomatik nümayəndəliklərini bağlayırdılar”, – deyə o bildirib.
Nazir həmçinin Almaniya kansleri Fridrix Mertsin “əslində müharibə elan etməyə doğru getdiyini” deyib.
“Belə görünür ki, nasizmin bu metastazları üzə çıxmağa başlayır. Bu, təhlükəli hadisədir. Mənə elə gəlir ki, Rusiya rəhbərliyi müvafiq nəticələr çıxaracaq”, – Lavrov vurğulayıb.
Bundan əvvəl Dobrindt Almaniya hakimiyyətinin Rusiyanın hibrid hücumlarına qarşı mübarizə aparmaq üçün kompleks plan hazırladığını açıqlamışdı.
