Yaxın Şərqdəki münaqişə fonunda Fars körfəzi ölkələri ABŞ-ın təhlükəsizlik təminatlarının etibarlılığını şübhə altına almağa başlayıblar.
Bu barədə sentyabrın 14-də “Time” jurnalı məlumat yayıb.
Jurnalın yazdığına görə, region ölkələri ABŞ-ın İsrailin tərəfində münaqişəyə qoşulmasından təəccüblənib. Bununla yanaşı, Vaşinqton münaqişənin nəticələrinin öhdəsindən gələ bilməyib.
Nəşrin məlumatına görə, Fars körfəzi ölkələri artıq uzun müddətdir ki, ABŞ-ın İran siyasətində ardıcıl və effektiv yanaşmanı itirdiyini düşünürlər.
“Məqsədlər hər həftə dəyişirdi. ABŞ administrasiyası hətta İran Hörmüz boğazını bağladığı vaxt belə münaqişədən mümkün qədər tez çıxmağa çalışırdı. Bu isə Fars körfəzinin ərəb dövlətlərində onların əvvəlcədən xəbərdar edilmədən, məsləhətləşmələr aparılmadan və lazımi müdafiə təmin olunmadan müharibəyə cəlb edildiyi təəssüratı yaradıb”, – məqalədə deyilir.
Bu vəziyyət fonunda regionun bir çox ölkəsi əvvəlki siyasətinə – İranla qarşıdurmadan daha çox çəkindirmə və gərginliyin azaldılması siyasətinə qayıdıb.
Qətər və Oman ABŞ-a təzyiq göstərərək mümkün qədər tez sülh sazişinə nail olunmasına çalışıblar.
Küveyt və Bəhreyn əvvəlcə münaqişənin davam etdirilməsini dəstəkləsələr də, sonradan onlar da regionun digər dövlətlərinin mövqeyinə qoşulublar.
