“WikiLeaks”in təsisçisi Culian Assanj iki ildən sonra ilk dəfə sosial şəbəkədə paylaşım edib. O, qısa mesajla geri qayıtdığını elan edib. “Mən geri döndüm”, – Assanj yazıb.
Onun bundan əvvəlki paylaşımı 28 iyun 2024-cü il tarixində olub. Həmin paylaşım Assanjın Britaniya həbsxanasından azad edilməsindən qısa müddət sonra yayımlanmışdı.
Assanj 2019-cu ildən Böyük Britaniyanın Belmarş ciddi rejimli həbsxanasında cəza çəkirdi. O, Londondakı Ekvador səfirliyindən çıxarıldıqdan sonra həbs olunmuşdu.
ABŞ uzun müddət Assanjın Böyük Britaniyadan ekstradisiyasına nail olmağa çalışıb. Vaşinqton beş ildən çox müddət ərzində onun ABŞ-a təhvil verilməsini tələb etsə də, “WikiLeaks” təsisçisinin müdafiəçiləri bunun qarşısını almaq üçün hüquqi mübarizəni davam etdiriblər.
Nəticədə tərəflər ABŞ prokurorları ilə razılaşma əldə ediblər. Razılaşmaya əsasən, Assanj məxfi məlumatları əldə etmək və yaymaq məqsədilə cinayətkar sövdələşmədə iştirak etdiyini etiraf edib.
Məhkəmə ona Britaniya həbsxanasında artıq çəkdiyi müddətə bərabər cəza verib.
Assanj 26 iyun 2024-cü ildə ailəsinin yaşadığı Avstraliyaya qayıdıb.
